Qazaqfılm stsenarıı baıqaýynyń jeńimpazdaryn anyqtady
ALMATY. QazAqparat - «Qazaqfılm» kınostýdııasy janyndaǵy «Debıýt» shyǵarmashylyq-óndiristik birlestigi stsenarııler baıqaýynyń jeńimpazdaryn jarııalady, dep habarlaıdy QazAqparat tilshisi.
Konkýrsqa otyzdan astam qysqametrajdy kórkem fılmder stsenarııleri túsken. Olardyń ishinen bes jumys iriktelip alynǵan.
Atap aıtqanda, Qaıyrjanova Veneranyń «Tyǵylmaq», Baımuratov Armannyń «Taqııa», Rahmetalıev Alennyń «Tózim», Jahanov Beriktiń «Keshirim», sondaı-aq Jylysbaeva Ardaqtyń «Jut» stsenarııleri úzdik dep tanyldy.
«Bizge jiberilgen stsenarıılerdiń ishinen beseýin iriktep aldyq. Olardyń barlyǵy ústimizdegi jyly óndiriske jiberiledi. Tórt týyndynyń rejısseri avtorlardyń ózderi bolmaq. Al «Jut» stsenarııin Espenbetov Jandos esimdi jas rejısserge berýdi jón sanadyq. Mundaı tájirıbe «Debıýt» ShÓB-de kópten beri jasalynbaǵan bolatyn», - dedi «Qazaqfılm» AQ Eksperttik keńesiniń teńtóraǵasy Bekbolat Shekerov.
Esterińizge sala keteıik, sáýirde «Qazaqfılm» «Debıýt» ShÓB atynan stsenarııler baıqaýyn jarııalaǵan bolatyn. Shart boıynsha baıqaýǵa jas avtorlarmen qatar óz isiniń kásibı mamandary da qatysa alatyn. Saıysqa Kenjebek Shaıqaqov, Ǵazız Nasyrov, Ardaq Jylysbaeva jáne Tımýr Maqajanovtar sııaqty tájirıbeli avtorlar da qatysty.
Aıta ketý kerek, «Qazaqfılm» qysqametrajdy kórkem kartınalardy 1959 jyldan bastap shyǵaryp keledi. Keıinirek kınostýdııada «Debıýt» shyǵarmashylyq-óndiristik birlestigi qurylyp, búginde ony Anar Qashaǵanova basqarady.
