«Qazaqfılm» ózin-ózi aqtaı almaı otyr – Esep komıteti
NUR-SULTAN. QazAqparat – «Qazaqfılm» AQ jumysy tabysty bolmaı tur. Mádenıet jáne sport mınıstrliginiń jekelegen bıýdjettik baǵdarlamalarynyń iske asyrylýy boıynsha júrgizilgen memlekettik aýdıttiń qorytyndysy boıynsha Esep komıtetiniń múshesi Talǵat Jaqan osylaı dedi, dep habarlaıdy QazAqparat tilshisi.
«2018-2019 jyldar aralyǵynda «Qazaqfılm» AQ-ty ustap turýǵa 1 mlrd 129 mln teńge shyǵyndalǵan. Kórsetilgen kezeńdegi is-sharalardy ótkizýden túsken tabys - fılm óndirisin qospaǵanda, 638,1 mln teńgeni nemese ketken shyǵynnyń 56,5 paıyzyn qurady. Qazirgi ýaqytta «Qazaqfılm» AQ kınoındýstrııasynyń salalyq qalyptastyrýshy kásiporny moraldyq jáne fızıkalyq turǵydan tozyp qalǵan materıaldyq-tehnıkalyq bazaǵa ıe. Zamanǵa saı qural-jabdyqtarmen jáne tehnologııalarmen tıisti túrde jańǵyrtylyp, tehnıkalyq turǵyda jaraqtandyrylǵan jaǵdaıda «Qazaqfılm» ózin-ózi aqtaı alýy múmkin. Mysaly, Reseıdiń «Mosfılmi» men Ózbekstannyń «Ózbekkıno» ulttyq agenttigi osylaı jumys júrgizedi. Ol jaqta tolyqqandy kıno óndirisi men táýelsiz kıno naryǵyn qurýǵa jaǵdaı jasalǵan», - dedi ol Esep komıtetiniń otyrysynda.
Talǵat Jaqan sonymen birge, «Qazaqfılm» AQ-qa kıno nemese derekti fılm bolyp túsirilmeı qalǵan ádebı stsenarııler de qabyldanǵanyn aıtady. Prokatta suranysqa ıe bolmaıtyn fılmder de shyǵarylǵan.
«Máselen, 2010 jyldan bastap bekitilgen 48 stsenarıı boıynsha fılmder túsirilmeı, túsirilgen 325 fılmniń 185-i prokatqa shyqpaı qalǵan. Olardyń quny 19 mıllıard teńgeden asady. Kınoteatrlar men teledıdarlar arqyly taratýdan túsken kirister fılmderdiń ózindik baǵasyn shyǵaryp bere almaıdy. Sońǵy 9 jyl ishinde 161 kartına jasalyp, olarǵa 42 mıllıard 951 mıllıon teńge jumsalǵan», - dep qorytyndylady Talǵat Jaqan.
