«Qazaqfılm» múgedek boıjetken týraly fılm túsirdi

QR Mádenıet jáne sport mınıstrliginiń tapsyrysy boıynsha túsirilgen bul fılmniń rejısserleri ári stsenarıı avtorlary Ázızjan Zaırov pen Muhamed Mamyrbekov. 

«Qyz ben teńiz» fılminiń negizi ómirden alynǵan oqıǵadan turady. Bas keıipker qyz ARDI múgedek balalary bar ata-analar qaýymdastyǵy ońaltý ortalyǵynyń tárbıelenýshisi Dınara Sháripova. Aq jarqyn, eńbekqor, kómek qolyn árdaıym sozýǵa daıyn turatyn Dınara óte ójet. Fılmdegi bas keıipkerdiń esimi Ásel. Onyń bar armany - mahabbatyn kezdestirip, otbasyn qurý jáne bala tabý. 
«Áleýmettik fılmderdi túsirýden uqqanym, múmkindigi shekteýli jandarǵa kınematograf arqyly kelgen art-terapııanyń áseri ınklıýzıvti (barlyǵy qamtylǵan) bolatynyn túsindim. Áleýmettik baǵytta túsirilgen «Byt ılı ne byt?» jáne «Qyz ben teńiz» jobalarynan keıin bizdiń «akterlerimizdiń» qalaı ózgerip, ózderine degen senim paıda bolǵanyn baıqadym. Sonyń arqasynda qoǵam ómirine ımenbeı aralasýǵa daıyn ekenderi kórinip tur. Ózim balalar úıinde tárbıelengenderdiń birimin. Maǵan kezinde ómirge degen qushtarlyqty úıretken osy óner, kınematograf. «Qyz ben teńiz» fılmi kórermenderge múmkindigi shekteýli adamdardyń qandaı qıyndyqtarmen kezigip, qandaı qıyndyqtardy bastan keshirip otyrǵandaryn kórsetedi. Kórermender bizdiń keıipkerlerdi qórý arqyly adam múmkindikteriniń shekteýsiz ekenin túsinedi jáne ózderine degen senim ulǵaıa túsedi dep oılaımyn. Biz, avtorlar, gýmanıstik jáne jasampaz maǵyna beretin bul fılm otandyq kórermenderdiń ǵana emes, sondaı-aq, sheteldikterdiń de kóńilinen shyǵady jáne halyqaralyq kınofestıvalderden óz baǵasyn alady dep úmittenemin. Bolashaqta tek osy sıpattaǵy fılmderdi QR Mádenıet jáne sport mınıstrligi jáne «Qazaqfılm» kınostýdııasymen birlesip túsiretin bolamyn», - dedi Azızjan Zaırov. 

Qazir joba postprodakshn kezeńinde tur. Fılmniń túsirilimderi Almaty qalasynda jáne Qapshaǵaı jaǵalaýynda ótken. Fılmge túskenderdiń  barlyǵy derlik kásibı akterler emes, múmkindigi shekteýli adamdar (BTsP dıagnozy jáne psıhıkalyq damý bógelisi bar). Al bas keıipkerdiń ápkesi róline teatr jáne kıno aktrısasy GúlbaHram Baıbosynova shaqyrylǵan.
«Túsirilgen materıaldarǵa shyǵarmashylyq toptyń kóńili tolady. Óıtkeni, bárimiz de osy jobaǵa barymyzdy saldyq. Túsirilim barysynda bir kadrdy birneshe ret qaıtalap túsire bergen kezderimiz boldy. Olaı istegen sebebimiz, keıipkerlerimiz qajetti emotsııany jáne kóńil-kúıin nanymdy bere alsa eken dedik. Bizdiń «akterlerimiz» bar talantyn salyp, ózderiniń shyǵarmashylyq áleýetin barynsha kórsete alýyn qaladyq. Erteńgi kúni, fılmdi kórip otyrǵan kórermen fılmdegi keıipkerlerdiń ınva arbaǵa taǵylǵanyna jany ashyǵanynan emes, olardyń akterlik oıynyna tań-tamasha bolǵanynan qol shapalaqtasa eken degen edik», - dep qosty Azızjan Zaırov. 

Rejısserleri: Muhamed Mamyrbekov, Ázızjan Zaırov 
Qoıýshy operatory: Tımýr Itenov
Rólderde: Dınara Sháripova, Tahır Omarov, Qanaǵat Tasqaraev, Gúlbahram Baıbosynova, Saýran Qasteev, Almat Ádilbaev jáne basqalary.