Qazaqfılm «Mereke» atty qysqametrajdy fılm-debıýttiń túsirilimin aıaqtady
Qysqametrajdy fılm-debıýttyń túsirilimine bir apta ýaqyt ketti.
Kınokartına QR Mádenıet jáne sport mınıstrliginiń tapsyrysy boıynsha Ulttyq kınony qoldaý memlekettik ortalyǵynyń qoldaýymen «Qazaqfılm» kınostýdııasynda túsirildi.
Jobaǵa 40-tan asa adam jumyldyrylǵan. Fılmde basty rólderdi tanymal akterler Dýlyǵa Aqmolda men Danııar Bektenov oınady.
Fılmniń basty keıipkeri 7 jasar Aıdar - jergilikti kásipker Sáken men úı sharýasyndaǵy áıel Álııanyń jalǵyz uly.
Oqıǵa jelisi ómirdiń árbir sátterin, balalyq shaqtaǵy ǵajaıyp estelikterdi umyt qaldyratyn adam sanasy men oǵan qaıta aparar jol týrasynda órbigen.
Qarapaıym oqıǵadan bastaý alatyn fılm adam bolmysyndaǵy kishkentaı fılosofııany qozǵaıdy.
Oqıǵa kórermenge adam - jadymyzdaǵy jarqyn estelik, al balalyq shaq - eshqashan qaıtyp kelmeıtin kezeń ekenin jetkizedi.
«Kartına shaǵyn bolsa da, shamaly kúnniń ishinde komanda bir-birine úırenip qaldy, joba úshin jumyla at salysty. Árıne, protsess barysynda keıbir kútpegen qıyndyqtar týyndap jatty, biraq túsirilimge keri áserin tıgizbedi. Biz úshin eń qıynǵa soqqany - trassa boıyndaǵy sahnalardy túsirý boldy. Soǵan qaramastan fılmniń qoıýshy operatory Mırhat Chapaı «Qazaqfılmniń» komandasymen birlese jaqsy jumys atqardy dep oılaımyn. Bizdiń fılmde kúnniń batýy, atýy sııaqty rejımdegi sahnalar kóp, solardy túsirip úlgerý úshin, tártip óte qatań boldy. Óz basym úshin alǵash ret bala aktermen, úlken aktermen jumys jasaý jańa tájirıbe boldy. Dýlyǵa aǵanyń túsirilim alańynda kóp kómegi tıdi. Sońǵy kún basqa kúnderge qaraǵanda jeńil ótti. Bul kúni biz túsirilip úlgermeı qalǵan kadrlardy, fılmniń sıýjettik mańyzy bar sahnalaryn taspaladyq. Akterlyq quram bir-birine úırenisip ketken soń, kadrdaǵy kóńil-kúı shynaıy shyqty dep oılaımyn»,- dep bólisti fılmniń stsenarıı avtory ári qoıýshy rejısseri Іńkár Kárim.
Bul jobaǵa deıin jas rejısser jekemenshik qysqametrajdy fılmder túsirip kelgen. Onyń birazy kınofestıvalderge qatysyp ta úlgerdi.
Rejısserdiń aıtýynsha, «Mereke» fılminiń stsenarııiniń alǵashqy nusqasy sál ózgeshe bolǵanymen, basty ıdeıa joǵalmaǵan.
Jaqyn arada shyǵarmashylyq top kartınanyń montajdaý protsesine kirispek.
«Fılmniń montaj protsesine dedlaındarǵa baılanysty túsirilimnen soń ýaqyt sozbaı kirisýimiz qajet. Negizi montajǵa deıin sanany sýytyp, materıal shamaly «dem alǵan» soń kirisken durysyraq dep oılaımyn óz basym. Alaıda, alda áli dybys, tús óńdeý sııaqty kóptegen tehnıkalyq jumys kútip tur»,- dep tolyqtyrdy rejısser.
Qysqametrajdy «Mereke» fılm-debıýti kórermenge keler jyldyń basynda jol tartady.
Aıta keteıik, «Mereke» debıýt fılmi 2022 jylǵy 7-11 maýsym aralyǵynda ótken Ulttyq kınony qoldaý memlekettik ortalyǵynyń kezekti pıtchınginiń qorytyndysy boıynsha memlekettik qarjylandyrýǵa ıe boldy.
Foto: kazakhfilmstudios.kz
