«Qazaqfılm» men «Belorýsfılm» yntymaqtastyq memorandýmyna qol qoıdy
Memorandým birlesken kınoóndiris máselelerin retteýge baǵyttalǵan. Sonymen qatar, qujatta kınoóndiristi uıymdastyrýǵa yqpaldastyq etý, kıno týyndylardy jyljytý jáne dıstrıbýtsııasyn jasaý, kınematografııa salasyndaǵy mamandardy taǵylymdamaǵa jiberý máseleleri de qamtylǵan.
Yntymaqtastyq týraly kelisimdi sóz ete kele «Qazaqfılmniń» vıtse-prezıdenti Dáýren Ábdihamıtov, atalmysh memorandým eki eldiń kınematografııa salasyndaǵy baılanysy men dostyq qarym-qatynasy jolyndaǵy mańyzdy qadam ekenin basa aıtty.
Shanhaı yntymaqtastyq uıymyna múshe elderi kınofestıvaliniń konkýrstyq baǵdarlamasyna 23 kınolenta qatysyp otyr. Olardyń arasynda eki otandyq kartına - rejısser Rústem Ábdirashevtiń «Almas qylysh» tarıhı fılmi jáne rejısser Talǵat Temenovtiń «Bizdiń qalanyń hanzadasy» melodramasy bar. Jalpy kınofestıvalde kórermenderiniń nazaryna 60 kartına usynylmaq.
Sonymen qatar, festıvalde kórermender Sh.Aımanov atyndaǵy «Qazaqfılm» kınostýdııasy túsirgen basqa da kartınalardy tamashalaı alady. Olar: rejısser Aqan Sataevtyń «Anaǵa aparar jol» áskerı dramasy jáne rejısser Sábıt Qurmanbekovtyń «Oralman» kartınasy.
Úzdikterdi 12 kásibı mamannan turatyn qazylar alqasy anyqtaıtyn bolady. Qazylar alqasynyń tóraǵasy tanymal qytaılyq prodıýser Han Sanpın.
Aıta keteıik, qazaqstandyq rejısser, prodıýser Sergeı Azımov negizgi konkýrstyń qazylar alqasy qatarynda.
Qatysýshylardy «Úzdik fılm», «Úzdik rejıssýra», «Úzdik stsenarıı», «Úzdik er adam róli», «Úzdik áıel adam róli» nomınatsııalary boıynsha jáne qazylar alqasy taǵaıyndaǵan arnaıy júldemen marapattaıdy.
17 maýsymǵa deıin jalǵasatyn ShYU aıasyndaǵy kınofestıvaldi QHR memlekettik kınematografııa basqarmasy men Shandýn provıntsııasynyń ákimshiligi uıymdastyrdy.
Dáýlet Іztileý
