Qazaqfılm Qytaı kınostýdııasymen birlesip túsiredi delingen fılmge baılanysty túsinikteme berdi
ASTANA. QazAqparat - «Qazaqfılm» AQ «Batys Qytaı fılm» korporatsııasymen birlesip túsiredi delingen fılmge baılanysty túsinikteme berdi, dep habarlaıdy QazAqparat.
Eske sala ketsek, qytaılyq news.sina.com saıty «Qazaqfılm» AQ men «Batys Qytaı fılm» korporatsııasy birlesip, «Mahabbat ótkelderi» atty romantıkalyq komedııa janrynda fılm túsiretindigi týraly habarlaǵan bolatyn. Týyndyǵa qytaı azamaty men qazaq qyzynyń arasyndaǵy mahabbat arqaý bolatyndyǵy aıtylǵan edi. Bul áleýmettik jelide qyzý talqylanyp jatyr.
Osyǵan baılanysty, «Qazaqfılm» AQ baspasóz qyzmeti «Qazaqfılm» AQ qytaılyq kınematografıstermen memorandýmǵa qol qoıylǵanyn, biraq ázirge naqty jobalardyń talqylanbaǵanyn habarlady. «Qazirgi ýaqytta Qazaqfılmniń Qytaımen birlesken bir ǵana jobasy bar - ol bir kezderi KSRO-da ómir súrip, qyzmet atqarǵan talantty qytaılyq kompozıtor Sı Sınhaı týraly «Kompozıtor» fılmi (Onyń esimi Almaty men Astana kóshelerine berilgen)», - delingen baspasóz qyzmetiniń habarlamasynda.
