«Qazaqfılm» qysqametrajdy kórkem fılmder stsenarıine baıqaý jarııalady
ASTANA. QazAqparat - Sháken Aımanov atyndaǵy «Qazaqfılm» kınostýdııasynyń «Debıýt» shyǵarmashylyq-óndiristik birlestigi qysqametrajdy kórkem fılmderdiń stsenarıılerine baıqaý jarııalady, dep habarlaıdy QazAqparat.
«Shartqa sáıkes, baıqaýǵa Qazaqstan Respýblıkasynyń azamattary ǵana qatysa alady. Stsenarıı kólemi 5-20 bet bolýy kerek. Qazaq nemese orys tilderinde jazylǵan stsenarıı nemese ádebı shyǵarmalar jelisi boıynsha (bir nemese birneshe avtorlar) bolýy tıis. Úmitkerlerdiń bilimi arnaıy nemese kınematografııa salasyna jaqyn bolýy qajet, sondaı-aq buryn stsenarııshi nemese rejısser retinde jasaǵan jobalary bolǵany abzal», - delingen baspasóz baıanynda.
Stsenarıı mazmunynda konstıtýtsııalyq qurylymdy kúshtep ózgertýdi úgitteý nemese nasıhattaý, respýblıkanyń tutastyǵyn buzý, memleket qaýipsizdigine zııankestik jasaý, áleýmettik, násildik, ulttyq, dinı, tektik jáne rýlyq ústemdikti, qatygezdik pen zorlyq-zombylyqty úgitteý nemese nasıhattaý kórinisteri bolmaýy kerek. Sonymen qatar pornografııalyq jáne arnaýly seksýaldyq-erotıkalyq sıpattaǵy kórinister bar stsenarııler de qatystyrylmaıdy.
«Debıýt» shyǵarmashylyq-óndiristik birlestigi qabyldanǵan stsenarıılerdiń óndiriske jiberilýine kepildik bermeıdi. Stsenarııler 2017 jyldyń 1 mamyryna deıin qabyldanady.
