«Qazaqfılm» kınostýdııasyna kúrdeli jóndeý jumystary júrgiziledi
ALMATY. QazAqparat – Qazaqstan Respýblıkasy Premer-Mınıstriniń orynbasary Eraly Toǵjanov Almatyǵa jumys sapary aıasynda Almaty qalasy ákiminiń orynbasary Erjan Babaqumarovpen birge «Qazaqfılm» AQ ǵımaratynda bolyp, shyǵarmashylyq zııaly qaýymmen jáne Dostyq Úıinde etnomádenı birlestikterdiń kóshbasshylarymen kezdesti, dep habarlaıdy QazAqparat tilshisi.
Vıtse-premer kınostýdııany jańǵyrtýdyń jańa baǵdarlamasymen tanysty. «Qazaqfılm» AQ prezıdenti Aqan Sataev memleket bólgen qarajat aıasynda kelesi jyly qurylys jumystaryn bastaý josparlanǵanyn aıtty. Úsh jyldyq kezeńde barlyq nysandar jóndeledi, eki angar salynady, ınjenerlik jeliler jańartylady.
«Osy jumystardyń arqasynda biz kınostýdııany jańa halyqaralyq deńgeıge shyǵaryp, Azııa aımaǵynda kóshbasshy orynǵa shyqqymyz keledi. Biz altyn murany saqtaı otyryp, alǵa sapaly qadam jasaǵymyz keledi. Qala ákimdigi tarapynan úlken qoldaý kórsetilýde», - dedi Aqan Sataev.
Eraly Toǵjanov akterler Asanáli Áshimov pen Merýert Ótekeshevany, sondaı-aq dybys operatory Qadyr Qosaıdy otandyq kınoındýstrııada erekshe oryn alatyn jáne mıllıondaǵan kórermen moıyndaǵan «Qyz Jibek» pen «Atamannyń aqyry» fılmderiniń 50 jyldyǵymen quttyqtady. Kınematografısterge «Qazaqfılm» kınostýdııasy jáne «Qazposhta» AQ shyǵarǵan arnaıy poshta markalary tabys etildi.
Kezdesý barysynda qazaq aqyny, jýrnalıst jáne redaktor, Qazaqstannyń eńbek sińirgen qaıratkeri, QR Jazýshylar odaǵynyń tóraǵasy Ulyqbek Esdáýlet ınfraqurylymdy jańǵyrtý máselelerine toqtaldy. Onyń aıtýynsha, Almaty qalasy ákimdiginiń qoldaýymen Jazýshylar úıiniń negizgi ǵımaratynda jóndeý jumystary aıaqtaldy, kelesi satyda - konferentsııa-zaly. Modernızatsııalaý aıasynda nysannyń tarıhı kelbetin saqtaý kózdelgenin atap ótti.
Sonymen birge, Premer-Mınıstrdiń orynbasary E.Toǵjanov respýblıka men qalanyń etnomádenı birlestikteriniń ókilderimen búkilqazaqstandyq birlikti nyǵaıtý jáne memlekettik jáne azamattyq qoǵam ınstıtýttarynyń etnosaralyq qatynastar salasyndaǵy ózara is-qımylynyń tıimdiligin arttyrý máselelerin talqylady.
«Ahyska» túrik etnomádenı ortalyǵy» RQB tóraǵasy Zııatdın Kasanov, «Mıtsva» Qazaqstannyń evreı ulttyq uıymdary qaýymdastyǵy» ZTB basshysy Aleksandr Baron, «Qazaqstan uıǵyrlarynyń respýblıkalyq mádenı ortalyǵy» QB qurmetti tóraǵasy Ahmetjan Shardınov, «Naırı» Qazaqstan Respýblıkasynyń armıan mádenı ortalyqtary qaýymdastyǵy» respýblıkalyq QB tóraǵasy Artýsh Karapetıan júrgizilip jatqan jumystar týraly aqparat berip, etnosaralyq kelisimdi, qoǵamdaǵy toleranttylyq pen halyq birligin odan ári nyǵaıtý boıynsha birqatar usynystar aıtty.
Jekeleı alǵanda, otandyq ǵylymdy, ulttyq mádenıet jáne salt-dástúrlerdi damytý, sonymen birge, pandemııamen jalpy kúres aıasynda etnomádenı uıymdardyń ıntegratsııasy boıynsha kúsh salýy, muqtaj qala turǵyndaryna qoldaý sharalary jónindegi ıdeıalar aıtyldy.
Etnomádenı birlestikterdiń kóshbasshylarymen kezdesý qorytyndysy boıynsha Premer-Mınıstrdiń orynbasary Eraly Toǵjanov QR Aqparat jáne qoǵamdyq damý mınıstrligine aıtylǵan usynystardy zerdelep, pysyqtaýdy tapsyrdy.
