Qazaqfılm kınoprokatqa qandaı fılmder usynatyny belgili boldy
ALMATY. QazAqparat – Qazaqfılm kınostýdııasy Gollıvýd fılmderiniń ornyna sáýir aıynan bastap kınoteatrlar prokatyna qandaı fılmder usynatyny belgili boldy, dep habarlaıdy QazAqparat tilshisi.
Sh.Aımanov atyndaǵy «Qazaqfılm» AQ 14 sáýirden bastap Darejan Ómirbaevtiń «Aqyn» atty jańa fılmin shekteýli prokatqa shyǵarady. Buǵan deıin atalmysh kartına Tokıoda ótken bedeldi halyqaralyq kınofestıvalde «Úzdik rejısser» nomınatsııasy boıynsha júldeger atanǵan bolatyn.
Qazirgi ýaqytta kınostýdııada «Bizdiń súıikti dáriger 2» fılmi túsirilip jatyr. Aıta keteıik, bul týyndynyń ataýy «Bizge dáriger kerek» bolyp ózgertildi.
Jaqyn ýaqytta qazaqstandyq kórermender úshin Aqan Sataevtyń «Uly dala tańy» blokbasteriniń premerasy ótedi. Joba buryn «Qasym han» degen atpen tanymal bolǵan.
«Bul bizdiń elimizdiń tarıhyndaǵy basty tulǵalardyń biri – Qasym han týraly aýqymdy hıkaıa.
Aty ańyzǵa aınalǵan bıleýshi XV-XVI ǵasyrlar aralyǵynda qazaq halqynyń bostandyǵy men táýelsizdigi úshin kúresken sımvoldyń birine aınaldy. Dál osy ýaqyt aralyǵy kóbine Qasym hannyń arqasynda bizdiń memlekettiligimiz ben uly qazaq dalasynyń gúldený kezeńi sanalady. Kópten kútken joba 12 mamyrda jaryqqa shyǵady», - dedi «Qazaqfılm» AQ ókili Kárim Qadyrbaev.
Sonymen qatar kınostýdııada aldaǵy ýaqytta bolatyn ulttyq kıno ortalyǵynyń pıtchıngine daıyndyq júrip jatyr. Osy jobaǵa qatysý úshin Qazaqfılm kreatıvti ıdeıasy bar jas, talantty avtorlardy birlese eńbek etýge shaqyrady.
«Qazaqfılm» elimizdiń jalǵyz memlekettik kınostýdııasy retinde kınematografıster men kórermenderdiń keıingi býyny aldyndaǵy jaýapkershiligin sezine otyryp, birlesken jobalardy júzege asyrýda jas rejısserler men stsenarısterge tolyq kómek kórsetýge daıyn», - dedi spıker.
Eske salaıyq, QR Mádenıet jáne sport mınıstrliginde vedomstvo basshysy Dáýren Abaevtyń tóraǵalyǵymen kınoprokat naryǵynda tanylǵan otandyq kompanııalar basshylarymen keńes ótti. Kezdesý kınoındýstrııany damytý máselelerine arnaldy.
