«Qazaqfılm» kastıngke kelýshilerden jasandy kirpik jalǵamaýdy ótindi
ALMATY. QazAqparat - «Qazaqfılm» kınostýdııasy «Elbasy joly. Beıbitshilik kindigi» jáne «Tumar» tarıhı týyndysyna kastıng jarııalaǵan bolatyn. Búgin kınostýdııanyń baspasóz qyzmeti kastıng barysynda qoıylatyn talaptardy jarııa etti, dep habarlaıdy QazAqparat tilshisi.
«Sporttyq dene bitimdi, jasyl nemese kók kózdi, shashtary sarǵysh adamdardy qýana qarsy alamyz. Qurmetti áıelder qaýymy! Kastıngke bet boıaýsyz jáne jasandy kirpiksiz kelýlerińizdi suraımyz. Tatýajy bar qyz-kelinshekterdi qabyldamaımyz», - delingen habarlamada.
Aıta ketý kerek, «Elbasy joly. Beıbitshilik kindigi» fılmin QR Mádenıet jáne sport mınıstrligi tapsyrysy boıynsha Sh. Aımanov atyndaǵy «Qazaqfılm» AQ «Sataifilm» kınokompanııasymen birlesip túsirgeli otyr.
Al massagetterdiń patshaıymy týraly «Tumar» atty tarıhı jobaǵa kastıng ústimizdegi jyldyń qyrkúıek aıyna deıin jalǵasady.
Kastıngke 16 jastan joǵary barlyq qazaqstandyqtar qatysa alady.
Almaty qalasynda irikteý kınosýdııanyń ǵımaratynda ótip jatyr.
Aıta ketsek, bul fılmderge kastıng Qazaqstannyń basqa da qalalarynda ótip jatyr. Jaqyn kúnderi kastıng Pavlodar, Semeı, Óskemen qalalarynda ótetin bolady.
Kastıngke qatysam degen 16 jastan joǵary adamdarǵa casting_satai@mail.ru elektrondy poshtasyna ózi týraly aqparat pen fotosýretterin jiberýi tıis.
