«Qazaqfılm» «Eń sulý qyz» fılminiń daıyndyq jumystaryn bastady
ASTANA. QazAqparat - «Qazaqfılm» kınostýdııasynda «Eń sulý qyz» atty kórkem fılmniń túsirilim aldyndaǵy jumystary bastaldy, dep habarlaıdy QazAqparat.
QR Mádenıet jáne aqparat mınıstrligi taratqan aqparatqa qaraǵanda, bul rejısser Qanaǵat Mustafınniń «16 qyz» komedııalyq fılminiń jalǵasy bolmaq. Fılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy «Kanaidarproduction» jáne «Sheshenfılm» stýdııasy túsiredi.
Fılm dostarynyń arasynda áli otbasyn qurmaǵan Samat jaıynda bolmaq. Dosy Baýyrjan oǵan qalyńdyq taýyp, úılendirmek bolyp, ekeýi qalyńdyq izdep úlken qalaǵa keledi. Bul saparda olar túrli oqıǵalarǵa tap bolady. Ekeýi oıda-joqta halyqaralyq qylmyskerler dep tanylyp, polıtseıler men bandıtterdiń qýǵynyna ushyraıdy.
Qazirgi tańda túsirilim toby daıyndyq kezeńinde. Túsirilim toby rekvızıtter daıyndap, kostıýmder men lokatsııa tańdaý ústinde. Sondaı-aq jýyq qosalqy rólderge kastıng jarııalanatyn bolady.
«Túsirilim toby birinshi fılmde jumys istegen mamandardan quralǵan. Olar rejısserdi jaqsy túsinedi. Esterińizde bolar, «16 qyzda» birinshi planda Berik Aıtjanov júrgizgen volga GAZ-21 kóligi bolatyn, bul joly Mın dáýiriniń antıkvarlyq qumyrasy bolmaq. Bul fılmde kórermenderdi sapaly ázilder men qyzyqty oqıǵalarmen baıytýǵa tyrystyq», deıdi fılmniń prodıýseri Aıdarhan Ádilbaev.
