«Qazaqfılm» bıýdjetimen álemdik naryqqa arnalǵan kıno túsirýge bolady - Nurtas Adambaev
ASTANA. QazAqparat - «Qazaqfılm» bıýdjetimen álemdik naryqqa arnalǵan kıno túsirýge bolady. Belgili rejısser Nurtas Adambaev óziniń feısbýktaǵy paraqshasynda osyndaı pikir qaldyrdy.
«Qazaqfılm» bıýdjetimen álemdik naryqqa arnalǵan kıno túsirýge jáne odan mol qarjy jasaýǵa bolady. Buǵan qosa, Qazaqstan jaqsy fılmder túsiretin el retinde tanymal bola alady. Budan basqa «mega-jobalarǵa» qaraǵanda áldeqaıda kóp paıda bolar edi», - dep jazdy N.Adambaev.
Aıta keterligi, buǵan deıin de ol T.Bekmambetovtiń otandyq fılmderdiń bılet baǵasyn arzandatý jáne arnaıy abonement engizý usynystaryna qatysty pikir bildirgen edi.
«Árıne, men Tımýrdy qurmetteımin. Degenmen, bul máselede men onymen kelispeımin. Qazaqstandyqtar otandyq kınolardy rahattanyp kóredi. Biz baıaǵyda da batys pen reseılik fılmderge toıǵanbyz. Bizdiń stýdııanyń alǵashqy úsh fılminiń kassalyq túsimi muny dáleldedi. Qazaqstandyq fılmderdiń bılet baǵasyn tómendetkenshe otandyq kıno zor suranysqa ıe bolýy úshin shynaıy birdeńeler jasaýǵa umtylý qajet shyǵar. Múmkin bıýdjet qarjysyn aqylmen jumsap, shynaıy qyzyqty fılmder túsirermiz? Múmkin onsyz da qıyn jaǵdaıda otyrǵan jeke stýdııalarǵa qoldaý kórsetken durys shyǵar? Jergilikti fılmderdiń bıleti qansha turý qajettigin talqylaý úshin Tımýrdyń ózi qansha qazaqstandyq fılm túsiripti? Mundaı ıdeıany nelikten ol Reseıde usynbaıdy? Reseılik kınony da amerıkalyqpen salystyrýǵa kelmeıdi», - dep jazdy ol.
Sonymen qatar ol N.Adambaev qazaqstandyq kıno bıletiniń baǵasyn tómendetý arqyly eń aldymen ózimizdi tómendetemiz degen oıyn da bildirgen.
«Osy arqyly biz barlyǵyna da artta qalǵandyǵymyzdy bildiremiz. Óıtkeni bizdiń kıno arzan. Bekmambetov kıno rejısseri retinde fılmdi túsirýge qansha aqsha jumsalǵany emes, onyń kórermenge qanshalyqty qyzyqty ekendigi mańyzdy ekendigin túsinýi tıis. Adamdar 100-200 teńge únemdep, bile tura nashar kınoǵa barady dep oılamaımyn. Kıno bul óte ádil. Jaqsy fılm bolsa adamdar barady, onsha bolmasa barmaıdy. Al abonementke qatysty ıdeıasy qıyn kezeńdegi azyq-túlikke arnalǵan talon júıesin eske túsiredi», - dedi rejısser.
