«Qazaqfılm» Azııa-Tynyq muhıty aımaǵyndaǵy kınoóndirýshiler federatsııasyna múshe boldy
ASTANA. QazAqparat - Sh.Aımanov atyndaǵy «Qazaqfılm» kınostýdııasy TMD elderi ishinen alǵash bolyp Azııa-Tynyq muhıt aımaǵyndaǵy kınoóndirýshiler Federatsııasynyń múshesi atandy, dep habarlaıdy QazAqparat kınostýdııanyń baspasóz qyzmetine silteme jasap.
Baspaósóz málimetterine qaraǵanda, kınostýdııanyń federatsııa quramyna kiretini týraly sheshim basqarma músheleriniń Beıjińde ótken «Azııa-Tynyq muhıty aımaǵyndaǵy elderdiń kıno salasyndaǵy birlesken yntymaqtastyǵy - 2018» atty 10-shy sezinde aıtyldy.
Azııa-Tynyq muhıt aımaǵy kınoóndirýshiler federatsııasyn 1954 jyly Gonkongtyń tanymal kınematografısi, metsenaty, medıamagnaty, Qytaı kınoóndirisiniń bastaýynda turǵan Shaý Ifý qurǵan.
Federatsııanyń negizgi baǵyty - kınoóndiristi damytýdaǵy yqpaldastyq, Azııa-Tynyq muhıty aımaǵyndaǵy elderdiń kınogerleri arasyndaǵy dostyq qarym-qatynasty nyǵaıtý, sonymen qatar, Azııadaǵy tarıhy tereńde jatqan kınofestıvaldi ótkizý.
Kınematografııasy damyǵan, álem moıyndaǵan Japonııa, Qytaı, Úndistan, Ońtústik Koreıamen qatar, federatsııa quramyna, kınoóneri qarqyndy damyp kele jatqan Avstralııa, Jańa Zelandııa, Malaızııa, Taıland, Vetnam, Indonezııa, Sıngapýr, Fılıppın, Iran, Pákistan jáne basqa elder de engen. Barlyǵy 24 memleket.
Qazaqstan kınematografısteri úshin bul jańasha damý, kınoóndiristegi jańa tehnologııalardy ıgerý jáne federatsııa músheligindegi eldermen birlesken jobalardy iske asyrý arqyly sol eldiń kınonaryǵyna ený.
Aıta ketelik, halyqaralyq yntymaqtastyq baǵytynda kınostýdııa birneshe jobalardy da qolǵa alǵan. 2017 jyly «Qazaqfılm» úndistandyq kınematografıstermen birlesken jobany iske asyrǵan bolatyn. «Qazaqfılmniń» qatysýymen elimizdiń kórikti jerleri kórinis tapqan rejısser Sachındra Sharmanyń «Love you family» atty týyndysy alǵash ret tek qazaq tiline tárjimalanyp, «Týǵan úıim tiregim» atty ataýmen otandyq kınoprokatqa jiberildi.
Sondaı-aq, kınostýdııanyń óndirisinde Azııa-Tynyq muhıty elderi kınoóndirýshileri federatsııasynyń taǵy bir múshe memleketi - Qytaımen jobasy bar. «Kompozıtor» fılmi Ekinshi dúnıejúzilik soǵys tusynda Almatyda ómir súrgen qytaılyq kompozıtor Sı Sın Haı men qazaqtyń uly kompozıtory Baqytjan Baıqadamovtyń dostyǵyn baıandaıtyn kórkem týyndy.
Azııa-Tynyq muhıty aımaǵy elderiniń kınoóndirýshiler federatsııasyna múshe bolý «Qazaqfılmge» birlesken jobalardy iske asyrýǵa múmkindigin beredi. Búginde bul kınostýdııanyń basymdyq berip otyrǵan baǵyttarynyń biri.
