«Qazaqfılm» anımatsııalyq jańa fılmniń treılerin jarııalady
ASTANA. QazAqparat - Sh.Aımanov atyndaǵy «Qazaqfılm» kınostýdııasy «Muzbalaq» atty tolyqmetrajdy kórkem anımatsııalyq fılmniń treılerin jarııalady, dep habarlaıdy QazAqparat.
«Eki jyl kóleminde jasalǵan bul fılm boıynsha 40-qa jýyq otandyq anımator jumys istedi. Uzaqtyǵy 65 mınýtty quraıtyn mýltfılm 2D jáne 3D formatynda túsirilgen jáne ár sekýndynda 24-25 kadr sýret salynǵan. Keıipkerlerdi dybystaýǵa Erjan Jarylqasynuly, Janat Tynybaev, Samat Qordabaı, Erǵalı Tólebaev, Alma Ádilqyzy esimdi teatr jáne kıno akterleri qatysty», - dep atap ótilgen «Qazaqfılmniń» baspasóz qyzmetiniń málimetinde.
Búrkit pen adamnyń dostyǵy týraly baıandaıtyn bul mýltfılm QR Mádenıet jáne sport mınıstrliginiń tapsyrysy boıynsha túsirilgen. Fılmdi rejısser-anımator - Turdybek Maıdan jáne Tilek Tóleýǵazy jasap shyqqan.
«Bes jasar búrkitti qazaq Muzbalaq deıdi. Qazaq bul tákappar qusqa jas ereksheligine qaraı at qoıady. Biz ańǵa shyqpasaq ta, ańshylardyń áńgimesin tyńdap óstik. Úlkendermen erip, ańdy qalaı tuzaqqa túsirýge bolatynyn da shet jaǵalap kózimizben kórdik. Qyrandy qalaı qondyryp, tuǵyryna qalaı otyrǵyzý qajettigin, atty qalaı baptap, qalaı jaratatynyn, qusty qalaı qolǵa ustaýǵa bolatynyn bizdeı eshkim bilmesi anyq», - dedi Turdybek Maıdan.
Esterińizge sala keteıik, kınostýdııa 2017 jyly tolyqmetrajdy eki anımatsııalyq fılm shyǵardy. Sonyń biri «Muzbalaq» bolsa, ekinshisi rejısser Adaı Ábildanyń tarıhı tulǵa, qolbasshy Kúltegin týraly kartınasy. Atalǵan fılmder tolyqqandy aıaqtalǵan jáne prokaty men tusaýkeseri ústimizdegi jyldyń kóktemine josparlanǵan.
