«Qazaqfılm» Ábish Kekilbaevtyń povesi boıynsha kórkem fılmdi túsirýdi bastady
ALMATY. QazAqparat - «Qazaqfılm» kınostýdııasynda «Shyńyraý» fılminiń túsirilimderi bastaldy, dep habarlaıdy QazAqparat tilshisi kıno kompanııanyń baspasóz qyzmetine silteme jasaı otyryp.
«Sh.Aımanov atyndaǵy «Qazaqfılm» kınostýdııasynda Ábish Kekilbaevtyń «Shyńyraý» povesi boıynsha tolyqmetrli kórkem fılmniń túsirilimderi bastaldy. Fılm Mádenıet jáne sport mınıstrliginiń tapsyrysy boıynsha túsirilýde. Fılm stsenarııiniń avtory jáne rejısseri Jańabek Jetirýov. Túsirilimniń barlyǵy derlik Mańǵystaý oblysynda Qaraqııa oıpatynda, Ústirt shoqysy jáne Kaspıı teńizi jaǵasynda túsiriledi. Fılm úshin Fort-Shevchenko qalasyna jaqyn jerdegi Qanǵa aýylynda dekoratsııalar turǵyzylyp, eldi meken faktýralandy. Basty rólderge Asylhan Tólepov pen Aldabek Shalbaev bekitilgen», delingen habarlamada.
Sondaı-aq, fılmge Muhamedjan Myrzakıev, Dáýlet Ábish, Qanatbek Qurymbaev, Maqsat Sábıtov, Azamat Sharǵyn, Zýhra Saıpı de túsetini málim boldy.
«Kóptegen otandyq kınematografıster uly Ábish Kekilbaevtyń povesi boıynsha fılm qoıýdy jáne ekrandaýdy armandady. Alaıda áli kúnge deıin povest ekran tilinde sóılegen emes. Men bul taqyrypta fılm túsirem dep júrgeli kóp boldy. Stsenarııdi tórt jyl buryn jazyp, túzetýlerdi kúni búginde deıin engizip otyrdym. Qazir meniń bar qalaýym Ábish Kekilbaevtyń povesi deńgeıindegi fılm túsirý. Biz lokatsııa men natýra tańdaý boıynsha kóp jumys atqardyq. Barlyq akterlerdi bekittik. Bir-eki kúnde Mańǵystaý oblysyna túsirilimderdi bastaýǵa jolǵa shyǵamyz», - dedi J.Jetirýov. 
