«Qazaqavtojoldyń» 100 paıyz aktsııalary «QazAvtoJol» kompanııasyna berilýi múmkin
Indýstrııa jáne ınfraqurylymdyq damý mınıstrliginiń Avtomobıl joldary komıtetiniń mundaı sheshimi ashyq talqylaýǵa shyǵaryldy, dep habarlaıdy QazAqparat tilshisi.
«Qazaqavtojol» jaýapkershiligi shekteýli seriktestiginiń 100 paıyz aktsııalar men memlekettik qatysý úlesi «QazAvtoJol» Ulttyq kompanııasyna berilsin. Qarjy mınıstrliginiń Memlekettik múlik jáne jekeshelendirý komıteti Qazaqstan Respýblıkasy Indýstrııa jáne ınfraqurylymdyq damý mınıstrligimen birlesip zańnamada belgilengen tártippen osy qaýlyny iske asyrý úshin qajetti sharalardy qabyldasyn», - de kórsetilingen qujatta.
Qaýlyda atalǵan sheshim qabyldansa, avtomobıl joldaryn paıdalanýshylardyń shaǵymdaryna jedel áreket etý múmkindigi artatyny jazylǵan. Sonmen qatar, kompanııalardy biriktirý kezinde eki kásiporynda da bar jáne qaıtalama mindet atqaratyn qyzmetkerler sany qysqartylady.
Qujat qol qoıylǵan kúnnen bastap kúshine enedi.
Aıta keteıik, Memleket basshysy Qasym-Jomart Toqaev Úkimettiń keńeıtilgen otyrysynda «QazAvtoJol» men «Qazaqavtojol» kompanııalaryn biriktirý kerektigin aıtty. «Kelesi másele – avtojol salasyna qatysty. Bul salaǵa túbegeıli reforma jasaıtyn ýaqyt jetti. Qazir elimizdegi joldyń jaı-kúıin qadaǵalap, qyzmet kórsetetin eki negizgi operator bar. Týrasyn aıtsaq, ekeýi de bir jumysty atqaryp otyr, jumysshylarynyń sany da qajetti shamadan artyq», - dedi Qazaqstan Prezıdenti.
Memleket basshysynyń aıtýynsha, azamattardan kelip jatqan oryndy aryz-shaǵymdar azaıar emes. Al joldyń sapasy múlde syn kótermeıdi.
Úkimetke «QazAvtoJol» jáne «Qazaqavtojoldy» biriktirip, Qazaqstannyń birtutas avtojol kompanııasyn qurýdy tapsyramyn. Nátıjesinde qyzmetkerlerdiń sany da qysqaratyn bolady», - dedi Qasym-Jomart Toqaev.