«QazaqAvtoJol» Qostanaı oblystyq fılıalynyń basshysy ustaldy
QOSTANAI. QazAqparat - Qostanaıda «QazaqAvtoJol» respýblıkalyq memlekettik kásiporny oblystyq fılıalynyń basshysy ustaldy, dep habarlaıdy QazAqparat tilshisi.
Sybaılas jemqorlyqqa qarsy is-qımyl ulttyq bıýrosynan málim etkendeı, 6 qarashada «QazaqAvtoJol» RMK Qostanaı oblystyq fılıalynyń (QOF) basshysy Nurlan Moldataev ustaldy. Ol QR QK 189-baby 4-bóligi 2-tarmaǵy («Asa iri kólemdegi urlyq») boıynsha aıyptalýda.
«N.J.Moldataev basqaratyn «QazaqAvtoJol» RMK QOF 2016 jylǵy qarasha aıynda qostanaılyq JShS-men jalpy somasy 174 mıllıon teńgege kelisim jasasqan. Olar bur qarjyǵa respýblıkalyq máni bar avtojoldarǵa qatysty jumystardy oryndaýǵa tıis bolǵan. Moldataev aqshany jymqyrý maqsatynda oblystyq JShS dırektorymen ózara kelisimge kelgen. Onda 220 myń lıtr dızel otyny jumsalǵany tek qaǵaz júzinde kórsetilgen", - dep habarlady vedomstvodan.
«Osylaısha, Moldataevtyń qylmystyq áreketterinen 2016 jyldyń sońynda «QazaqAvtoJol» RMK QOF tarapynan atalmysh JShS aldynda jalǵan bereshek jasaqtalady. Keıin, 2017 jyldyń qańtarynda Moldataev qaryzdy qaıtarý syltaýymen «QazaqAvtoJol» RMK Qostanaı oblystyq fılıalyna jalpy somasy 41 mıllıon teńgege 11 myń dızel otynynyń talonyn alady. Bul 220 myń lıtr suıyq otynǵa teń. Alaıda, ony ıemdenip, óz qajettiligine jumsaǵan», - delingen taratylǵan baspasóz habarlamasynda.
Nurlan Moldataev Rýdnyı qalasynyń ýaqytsha ustaý abaqtysyna jetkizildi.
Eske salaıyq, osy jyldyń qyrkúıek aıynda «QazaqAvtoJol» respýblıkalyq memlekettik kásipornynyń Qaraǵandy oblystyq fılıaly basshysynyń orynbasary Erjan Otarov jol jóndeý fırmasynyń dırektorynan para aldy degen kúdikpen ustalǵan bolatyn.
