Qazaq–aýǵan bıznes forýmynyń alǵashqy kúninde qandaı kelisimge qol qoıyldy
ASTANA. KAZINFORM — Kabýlda QR Premer-mınıstriniń orynbasary – ulttyq ekonomıka mınıstri Serik Jumanǵarın men Aýǵanstan Islam Ámirliginiń Ken óndirý jáne munaı mınıstri Hedaıatýlla Badrı kelisim jasasty.
Úkimettiń baspasóz qyzmetiniń málimetinshe, kezdesý barysynda taraptar ótken bir jyl ishinde ónerkásip salasyndaǵy ekijaqty qatynastardyń aıtarlyqtaı ilgerileýine rızashylyqtaryn bildirdi. Serik Jumanǵarın aýǵan tarapyna Qazaqstannan jetkizilgen geologtardyń qatty paıdaly qazbalardyń áleýetti ken oryndaryn zertteý boıynsha dalalyq jumystaryn uıymdastyrýǵa qoldaý kórsetkeni úshin alǵysyn bildirdi.
— Búgingi tańda Qazaqstan geologııalyq barlaý, qatty paıdaly qazbalardy óndirý jáne óńdeý salasynda tájirıbesi bar kásibı taý-ken kompanııalary pýlyn qurdy. Bul kompanııalar áleýetti ken oryndaryn izdeýge jáne ınvestıtsııa salýǵa múddeli. Osy baǵytty talqylaý úshin qazaqstandyq delegatsııa quramynda ERG Exploration, Kazakhmys Barlau jáne Qazatomónerkásip kompanııalarynyń ókilderi keldi, — dedi Serik Jumanǵarın.
Kezdesý barysynda aýǵan tarapy yntymaqtastyqty odan ári damytýǵa jáne qazaqstandyq mamandardyń zertteý jumystaryna qoldaý kórsetýge daıyn ekenin jetkizdi.
Taraptar barlyq týyndaǵan máseleni jedel talqylaý úshin birlesken tehnıkalyq komıssııa qurýǵa ýaǵdalasty.
Mamyr aıynyń sońynda Qazaqstan tarapy Aýǵanstannyń basqa provıntsııalaryndaǵy áleýetti ken oryndaryn zertteý úshin taǵy bir mamandar tobyn jibermek.
Sonymen qatar aýǵan tarapy qazaqstandyq taý-ken kompanııalarynyń suranysy boıynsha tabıǵı resýrstardyń rastalǵan qory týraly málimetter berýge daıyn ekenin bildirdi.
Sondaı-aq Serik Jumanǵarın Aýǵanstan Islam Ámirliginiń Memlekettik kompanııalar basqarmasynyń basshysy Ahmad Djan Bılalmen kezdesti.
Taraptar qazaqstandyq kásiporyndardyń Aýǵanstan memlekettik kompanııalarymen yntymaqtastyǵyn keńeıtý múmkindikterin talqylady.
$140 mln-dyq kelisimder: Qazaqstan–Aýǵanstan bıznes forýmynyń qorytyndysy
Serik Jumanǵarın Qazaqstan–Aýǵanstan bıznes forýmynyń ashylýyna qatysty. Sharaǵa ósimdik maıy, makaron, kúrishten bastap agrodrondar men akkýmýlıatorlarǵa deıingi taýarlardy usynǵan 50 qazaqstandyq kompanııa qatysty.
— Aýǵanstan Ortalyq jáne Ońtústik Azııa arasyndaǵy mańyzdy logıstıkalyq habqa aınala alady, al Qazaqstan – azyq-túlik, tehnologııa, mashına jasaý, hımııa jáne IT ónimderiniń senimdi jetkizýshisi bola alady. Aldymyzǵa ambıtsııaly, biraq qoljetimdi maqsat qoıyldy ıaǵnı, saýda aınalymyn qysqa merzimde $3 mlrd-qa deıin jetkizý. Bul maqsatqa jetý úshin turaqty jetkizý arnalary qurylyp, ózara saýda nomenklatýrasy keńeıip, ınvestıtsııalar men kásipkerlik belsendilikke qolaıly jaǵdaı jasalýy qajet, — dep atap ótti vıtse-premer.
Forýmnyń alǵashqy kúniniń aldyn ala qorytyndysy boıynsha shamamen $140 mln somasyna kommertsııalyq qujattarǵa qol qoıyldy.
Osydan buryn Kabýlǵa sapary barysynda Premer-mınıstrdiń orynbasary — ulttyq ekonomıka mınıstri Serik Jumanǵarın Qazaqstan halqynan Aýǵanstan halqyna gýmanıtarlyq kómektiń ekinshi jartysyn tapsyrǵanyn jazdyq.