«Qazaqanımatsııany» astanaǵa kóshirý kimge kerek – vıtse-mınıstr jaýaby

ASTANA. KAZINFORM – Mádenıet jáne aqparat mınıstriniń orynbasary Evgenıı Kochetov Úkimet otyrysynan keıin ótken baspasóz máslıhatynda «Qazaqanımatsııa» shyǵarmashylyq birlestigin Astanaǵa kóshirý usynysy qaıdan paıda bolǵanyn túsindirdi.

- Almatydaǵy anımatorlar «Qazaqanımatsııa» shyǵarmashylyq birlestigin Astanaǵa kóshirýge qarsy ekenderin bildirip jatyr. Sheshim naqty qabyldandy ma, qabyldansa, Almatydaǵy ujymdy Astanaǵa kóshirý kimge kerek? - dep surady jýrnalıst.

Vıtse-mınıstr jaýaby anımatsııany damytýǵa arnalǵan strategııa ázirlep jatqandarynan bastady. 

- Biz qazir anımatsııany damytýdyń aldaǵy 5 jylǵa arnalǵan keshendi josparyn ázirlep jatyrmyz. Ol josparda qarjylandyrý tetikteri de qarastyrylǵan. «Qazaqanımatsııa» shyǵarmashylyq birlestigin Astanaǵa kóshirý týraly paıymdar da bar. Ondaı paıymǵa ne negiz bolyp otyr?

Birinshiden, ózińiz biletindeı, bul jerde Astana hub ortalyǵy ornalasqan. Anımatsııalyq qyzmet ІT-ındýstrııanyń da bir bólshegi bolyp esepteledi. Astana hub-taǵy ımpýls anımatsııanyń damýyna da serpin beredi degen úmit bar.

Ekinshiden, bul jerde jyl saıyn Comic Con festıvali ótedi. Bul jalpy tutas anımatsııa salasyna arnalǵan, búkil TMD aýmaǵyndaǵy eń negizgi sharaǵa aınalyp úlgerdi.

Úshinshiden, kreatıvti ındýstrııany qoldaýǵa arnalǵan mamandandyrylǵan qordyń qurylatynyn aıttym. Osy sebepterdi negizinde birlestikti Astanaǵa kóshirý týraly paıymǵa kelip otyrmyz deýge bolady, - dedi Evgenıı Kochetov.

Vıtse-mınıstrdiń aıtýynsha, paıym bar bolǵanymen naqty sheshim áli qabyldanbaǵan.

- Anımatsııany damytýdyń strategııasyn daıyndap bolǵan kezde aqtyq sheshim belgili bolady. Qazirgi paıymymyz osyndaı. Menińshe, bul «Qazaqanımatsııany» ári qaraı damytý turǵysynan barynsha qısynǵa keletin paıym sııaqty. Biz anımatorlardyń bárimen baılanystamyz, olardyń ýájderimen de tanyspyz. Másele áli talqylaý protsesinde. Anımatorlarmen bir-eki ret kezdestik te. Báriniń pikiri eskeriledi. Onsyz eshkim sheshim qabyldamaıdy, - dedi Evgenıı Kochetov. 

Buǵan deıin Úkimet avtorlyq quqyq máselesine memlekettik monopolııa engizý usynysyn qoldamaı tastaǵanyn jazǵan edik.