«Qazaqaltynnyń» avtokóligine oq jaýdyrǵan kúdiktiler ustaldy

Bul týraly búgin ótken brıfıngte QR ІІM Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.

Q.Jumanovtyń atap kórsetkenindeı, shuǵyl-izdestirý sharalarynyń barysynda buryn sotty bolǵan Stepnogor qalasynyń 35 jáne 36 jastaǵy turǵyndary men «Eýrazııa sekıýrıtı» arnaıy ilesip júrý  tobynyń 35 jasar kúzetshisi ustaldy. Búgingi kúni olar qylmystaryn tolyq moıyndady. Málim bolǵandaı, ustalǵan kúzetshi qarýly shabýyldyń uıymdastyrýshysy, ári júkti tasymaldaýshy bolǵan.

«Shabýyl orny uıymdastyrýshymen belgilengen. «Mıttsýbısı-Galant» jáne «Moskvıch-412» avtokólikterine mingen qylmyskerler sholaq myltyqtarmen atqan. Odan keıin betperdelerdi, qarýlar men radıobaılanys quraldaryn Qarabulaq aýylynyń mańyndaǵy ormanǵa tyǵyp ketken»,  deıdi ol.

Esterińizge sala keteıik, «Qazaqaltyn» Taý-ken metallýrgııalyq kesheni» AQ-ǵa tıesili «Toyota Helux» avtokóligine qarýly shabýyl jasaý oqıǵasy, ústimizdegi jylǵy qazannyń 7-si kúni Aqmola oblysy, Aqkól aýdanyndaǵy Keńes jáne Azat aýyldarynyń arasyndaǵy jol boıynda boldy. Betperde kıgen 4 adam «Eýrazııa sekıýrıtı» JShS-nyń 8 kúzetshisiniń ilesýimen quramynda altyn bar qumdy tasymaldaý úshin jolǵa shyqqan avtokólikke avtomatty qarýlardan oq jaýdyrǵan.