«Qazaqaltyn» jumysshylaryn qysqartý: ýaǵdalastyqqa qol jetkizildi

KÓKShETAÝ. QazAqparat – «Qazaqaltyn» seriktestiginiń bir myńnan astam qyzmetkeri qysqartý týraly habarlama alǵannan keıin, Bestóbe kentinde narazylyqtar bastaldy. Kásiporyn basshylyǵy jumysshylarmen kelissózder júrgizip, ýaǵdalastyqqa qol jetkizildi. Kelisim kenish qyzmetkerlerin de, kent turǵyndaryn da qanaǵattandyrdy, dep habarlaıdy QazAqparat tilshisi.

Stepnogor qalasy ákimdigi baspasóz qyzmetiniń málimetinshe, 30 naýryzda jergilikti «Raýan» mádenıet úıine jınalǵan «Qazaqaltyn» JShS jumysshylary qysqartý týraly habarlamalardy berýdi toqtatýdy, sondaı-aq shahtalardan sýdy soryp alýdy, shahtalardy iske qosýdy jáne ınvestordy aýystyrýdy talap etken.

«Kompanııanyń bas dırektory Rústem Qarakesov jumysshylardy qysqartý jáne kásiporyn jumysyn toqtatý týraly habarlamalar berý, Bestóbe alańyn jańa ınvestorǵa qaıta resimdeý sharalaryn jedeldetý maqsatynda ári qoldanystaǵy zańnama sheńberinde júzege asyrylyp otyrǵanyn túsindirdi.

Áleýetti ınvestor – «Altyn qazyna» JShS-niń ókili Erlan Qabyldenovtiń túsindirýi boıynsha, oblys ákimdigi men QR IIDM áleýetti ınvestordyń aýdıti úshin Aktsıonerlik kompanııanyń qujattardy tezirek usynýyna járdemdesken jaǵdaıda, kásiporyn úsh aı ishinde kenishtegi jaǵdaıdy zerdeleýge jáne oń jaǵdaıda shahtalardan sý aıdaý boıynsha jumysqa kirisýge daıyn ekenin habarlady», - dedi Stepnogor ákimdiginiń baspasóz qyzmetinen.

Sondaı-aq, ákimdik «Qazaqaltyn» qyzmetkerlerine Stepnogordegi ózge ónerkásiptik kásiporyndarynda bar bos jumys oryndaryn usynǵan, sondaı-aq 6 aıǵa deıin jumysynan aırylý boıynsha áleýmettik tólemder beriletinen jetkizgen.

Іshki saıasat basqarmasynyń málimetinshe, «Qazaqaltyn» qyzmetkerlerimen kezekti kezdesý naýryzdyń 31-inde dál sol «Raýan» mádenıet úıinde ótti. Kezdesýge Indýstrııa jáne ınfraqurylymdyq damý vıtse-mınıstri Iran Sharhan, oblys ákiminiń orynbasary Erdos Ramazanov, «Qazaqaltyn» JShS Bas dırektory Rústem Qarakesov jáne Stepnogor qalasynyń ákimi Alpysbaı Qaıyrjanov qatysty.

«Kezdesý qorytyndysy boıynsha birqatar usynys ázirlendi. «Qazaqaltyn» JShS basshylyǵyna kásiporynnyń qyzmeti týraly qajetti aqparatty áleýetti ınvestorǵa jedeldetilgen tártippen usyný múmkindigi týraly usynys aıtyldy. Áleýetti ınvestorlardan 1 mamyrǵa deıin usynylǵan aqparatpen tanysýdy aıaqtaý talap etiledi. Birlesken sheshimde kórsetilgen sharttar kenish jumysshylary men kent turǵyndaryn qanaǵattandyrdy», - dep túsindirdi ishki saıasat basqarmasynan.

Ýaǵdalastyq pýnkteriniń oryndalýyn baqylaý Indýstrııa jáne ınfraqurylymdyq damý mınıstrligine júkteldi.

Foto: Stepnogor qalasy ákimdiginiń baspasóz qyzmetinen