Qazaq jylqysynyń quıryq qyly sán ındýstrııasynda qoldanylmaq
ASTANA. QazAqparat - Qazaq jylqysynyń qyly álemdik sán ındýstrııasy men mýzykalyq aspaptar óndirisinde kádege asýy múmkin, dep habarlaıdy QazAqparat «Habar 24» arnasyna silteme jasap.
Amerıkadan Almaty óńirine kelgen kásipker Ashok Jalanı jylqy qylynyń sapasy óte myqty ekenin aıtýda. Bolashaqta ol bizdiń elde kásiporyn ashýdy da josparlap otyr.
Ashok Jalanı sán ındýstrııasyna qajetti buıymdar shyǵarýmen 20 jyldan beri aınalysady. Jylqynyń qylynan skrıpka, vıoloncheldiń ysqysymen qatar, ádemi kirpik pen parık, sýretshiler men vızajısterdiń qylqalamyn, tipti tis şetkasyn jasaıtynyn aıtady.
«Qazaqstanda shamamen 2 mıllıonǵa jýyq jylqy bar eken. Meniń boljamym boıynsha, onyń 10 paıyzǵa jýyǵy aqboz attar. Bizdi qyzyqtyratyny da osy jylqylar», - deıdi Jalanı.
Kásipker shıkizattyń ár kelisin 50 myń teńgege baǵalap otyr. Biraq qoı qyryqqany bolmasa, jylqynyń quıryq qylyn satyp kórmegen jergilikti fermerler sheteldik azamattyń bastamasyna jatyrqaı qarap otyrǵany bar.
«Ár jylqydan quıryǵynan 200 gramm qyly kesilip alynady. 1 metrdeı bolýy kerek. Jylqyny tuldap almaıdy. Quıymshaq omyrtqasy bitken jerden 1 mıllımetr tómen túsiredi. Sodan keıin sonyń ústinen kesedi. Jýyp ótkizse quny tipti artady», - deıdi jylqytanýshy, professor Qaırat Ishan.
Ashok Jalanı buǵan deıin Mońǵolııa men Qytaıda qabyldaý oryndaryn ashqan. Biraq olardyń sapasy tómen ekendigin aıtýda.
«Alǵashqy ýaqytta aıyna 100 keliden alsam degen oıym bar. Jaqyn kúnderi Aqtóbe, Aqmola, Qostanaı oblystaryn aralap, sondaǵy fermerlermen kezdesýdi josparlap otyrmyn. Shıkizat jınaý máselesi jolǵa qoıylsa, óńdeıtin kásiporyn ashýǵa da bolar edi», - dep atap ótti amerıkalyq kásipker.
Al Agrarlyq ýnıversıtet ǵalymdarynyń aıtýynsha, bul jańǵyrtylatyn tabys kózi. Sebebi jylqynyń quıryq qyly 1,5-2 jylda qaıta qalpyna keledi.
