Qazaq jurty kúmis kómeı ánshi Roza Baǵlanovany sońǵy saparǵa shyǵaryp saldy

Qoshtasýǵa Roza Baǵlanovanyń shákirtteri, dostary, óner súıer qaýym, dúıim qazaq jurty kóp jınaldy. Zaldyń ishi men syrtty halyqqa toly boldy, ıne shanshar jer bolmady.

Qoshtasýda QR mádenıet mınıstri Muhtar Qul-Muhammed Elbasy Nursultan Nazarbaevtiń kóńil aıtý hatyn oqyp berdi. Onda: «Roza Tájibaıqyzy tabıǵat bergen tańǵajaıyp daýysymen, tamasha oryndaýshylyq sheberligimen, azamattyq jáne otansúıgishtik asyl qasıetterimen halqymyzdyń erekshe qurmeti men mahabbatyna bólengen jan edi. Onyń oryndaýynda kez kelgen álem halyqtarynyń ánderi ózgeshe qulpyryp, tyńdaýshynyń qulaq quryshyn qandyratyn. Uly Otan soǵysy jyldarynda ol maıdan dalasyn aralaı júrip án shyrqap, jaýyngerlerdi erlikke jigerlendirdi. Ózi ómirden ozǵanymen, ol kisiniń mol án murasy ǵasyrlar boıy halqymyzdyń júregin baýrap, janyna nurly shýaq syılaı beredi dep senemin», - delingen.

KSRO jáne Qazaqstannyń halyq ártisi Bıbigúl Tólegenova Roza Baǵlanovanyń jarqyn shaqtaryn eske alyp: «Men áli de Roza Tájibaıqyzynyń dúnıeden ozǵanyna senbeı turmyn. Amal qansha, ajalǵa ara tura almaımyz... Búgin Qazaqtyń mádenıeti men óneri úshin qazaly kún. Óıtkeni, ómirden qazaqtyń uly ánshi qyzy, qazaq óneriniń tarıhynda aıshyqty iz qaldyrǵan qaıratker adam ótti. Ondaı jan bir ǵasyrda bir ret keledi. Halyq ony sonaý Uly Otan soǵysynyń qaharly kúnderinen bastap biledi. Ol boraǵan oqtyń ortasynda jaýyngerlerdi ánimen jigerlendirgen azamat ánshi edi. Onyń ómiri halqymen birge boldy. Qashan da sózin «halqym» dep bastaıtyn. Sol halqyna eńbek te etti, sol halqynyń aldynda erkelep ómir de súrdi. Onyń dańqy álemdi sharlady. Talaı elderde bolyp, ánimen jurtty tamsandyrdy. Qazaq deıtin halyq barlyǵyn álemge jaıdy. Sol úshin bárimiz ony maqtanysh ettik. Ánshi retinde onyń ereksheligin jurttyń bári biledi. Onyń ǵajap daýysyn basqalarmen shatastyrý múmkin emes. Tek Rozaǵa tán kúmisteı syńǵyrlaǵan daýysty kez-kelgen adam ajyratar edi, sondaı daýysymen aramyzdan erekshelendi. Ómirde Roza Tájibaıqyzynyń azamattyq kelbeti aıryqsha edi. Jan-jaǵyna shýaq shashyp júretin. Sol úshin ony barlyǵymyz da erekshe jaqsy kórdik. Onyń úlken eńbegi laıyqty baǵalandy. KSRO halyq ártisi boldy, Qazaqstannyń Halyq qaharmany boldy. Eń bastysy - halyqtyń shynaıy qurmetine bólendi, sondyqtan da Roza Tájibaıqyzy árqashan halyqtyń súıikti ánshisi bolyp qala beretinine senemin. Janyń jánnatta bolsyn, qazaqtyń ánshi qyzy! ", - dedi.

"Bul qaza meniń janymdy qatty qınady. Óıtkeni, men Roza Baǵlanovamen tanys-bilis, dámdes-tuzdas boldym. Rozany ótken ǵasyrdyń sonaý 57-58 jyldarynan beri bilem. Onyń daýysynyń áýezi qandaı edi? Jany qandaı jarqyn, aqkóńil adam edi... Roza Baǵlanovadaı talant óte sırek týylady, ol birtýar tulǵa, talant ıesi", - dedi KSRO halyq ártisi, Eńbek Eri Erkeǵalı Rahmadıev.

"Meniń atymdy qazaqtyń birtýar ánshisi Baǵlanova Roza apamyzǵa uqsaǵan juldyz bolsyn dep, ánshi bolsyn dep, ata-anam Roza dep qoıǵan bolatyn. Men ómirimde osyndaı dara tulǵamen bir sahnada án salǵanyma qýanyshtymyn, baqyttymyn. Roza apamyz bizge, keıingi jastarǵa tálim-tárbıesi men ónegesin kórsete biletin. Men ol kisini óte qurmetteımin, syılaımyn. Bárimiz kútip júrgen toqsanyna jetpeı bul dúnıeden attanyp ketkeni qandaı ókinish. Shynymyzdy aıtsaq, janymyzǵa batty. Biraq ol kisi qazaq ániniń bulbuly bolyp halyqtyń júreginde máńgilik qalady. Áni, eshkimge uqsamaıtyn daýysy, qazaq mýzykasyna qosqan úlesi, qazaq mýzykasyndaǵy orny, ánshilik ónerdegi orny eń joǵary deńgeıde, birinshi satyda tura beredi", - dedi Qazaqstannyń halyq ártisi Roza Rymbaeva.

Roza Tájibaıqyzy Baǵlanova 1922 jyly 1 qańtarda qazirgi Qyzylorda oblysynyń Qazaly aýdanynda dúnıege kelgen. Orta mektepten soń Qyzylorda pedagogıkalyq ınstıtýtynda bilim alǵan Roza Baǵlanova ómir jolynda ánshilik ónerdi tańdady. Roza Baǵlanovanyń esimi 1940jyldardyń basynan dúıim jurtqa tanyldy. Almatydaǵy Abaı atyndaǵy Qazaq memlekettik akademııalyq opera jáne balet teatrynda, Jambyl atyndaǵy fılarmonııada, «Qazaqkontsert» mekemesinde eńbek etip, jarty ǵasyrdan astam halqyn ánge bóledi. KSRO, Qazaqstan jáne Qyrǵyzstannyń halyq ártisi ataǵyn ıemdengen ánshi sovet úkimetiniń, keıinnen táýelsiz Qazaqstan memleketiniń kóptegen orden-medaldarymen marapattalǵan. Atap aıtqanda, sovet ókimetiniń Lenın, «Eńbek Qyzyl Tý», «Halyqtar dostyǵy», «Qurmet belgisi» ordenderiniń, táýelsiz Qazaqstannyń eń joǵarǵy nagradasy - «Halyq qaharmany» ataǵynyń ıegeri atandy.