Qazaq jurty halyq ártisi Qudaıbergen Sultanbaevty sońǵy saparǵa shyǵaryp saldy

Óner ordasynyń ishi-syrty jurtshylyqqa toly boldy. Teatr tarlanymen qoshtasýǵa Qudaıbergen Sultanbaevtyń týǵan-týystary, dostary, qala turǵyndary men qonaqtary, mádenıet qaıratkerleri men ónersúıer qaýym, sahnalas áriptesteri men alys-jaqynnan onyń ónerine tabynýshy adamdar kóp keldi.

Qoshtasý kezinde Mádenıet vıtse-mınıstri Asqar Bóribaev Elbasy Nursultan Nazarbaevtyń kóńil aıtyp joldaǵan jedelhatyn oqyp berdi. Onda: «Daryndy akter, aqjarqyn azamat Qudaıbergen Sultanbaevtyń dúnıeden ótkenin estip otyrmyn. Asa aýyr qaıǵylaryńyzǵa ortaqtasyp kóńil aıtamyn. Qudaıbergen Táýekeluly óziniń akterlyq dara darynymen halyqtyń shynaıy súıispenshiligine bólengen óner ıesi edi. Ony jurtshylyq M.Áýezov atyndaǵy Qazaq drama teatrynyń ártisi retinde jaqsy biledi. Áıgili «Tamasha» oıyn-saýyq otaýynyń irgetasyn qalaýshylardyń biri bolyp, sonda somdaǵan aıshyqty rolderi arqyly halyqqa keńinen tanyldy. Zor abyroı bedeliniń arqasynda Parlamentke depýtat bolyp saılandy. Onyń ulttyq teatr ónerine bergeninen bereri mol edi. Onyń jarqyn dıdaryn halqymyz umytpaıdy dep oılaımyn. Marqumnyń topyraǵy torqa, jany jánnatta bolsyn. Jasamaǵan jasyn, kórmegen qyzyǵyn urpaǵy kóre bersin», - delingen.

M.Áýezov atyndaǵy Qazaq memlekettik akademııalyq drama teatrynyń dırektory Esmuhan Obaev búkil qazaq jurty otbasyna BAQ-tar arqyly kóńil aıtyp, teatrǵa da habarlasyp jatqandyqtaryn jetkizdi.

«Qudaıbergen Sultanbaev ónerde, sizderdiń júrekterińizde erekshe oryn alǵan tulǵa. Ol - «Tamasha» men teatrdyń naǵyz tarlany. El bolyp eńsesi túspeı, elimizdiń kókbaıraǵy máńgi jelbireı berse sen eshqashan umytylmaısyń. Uly óner tarlany, seniń aıaǵyńa jem tústi, jyǵyldyń, endi máńgige kettiń, bul pánıdegi ómiriń baqıǵa ketti. Baqıdan bizdi arýaǵyńmen qoldaı júr. Qosh baýyrym»,- dedi sahnalas áriptesi, dosy, Qazaqstannyń halyq ártisi Tuńǵyshbaı Jamanqulov.

64 jasynda dúnıeden ozǵan, «Tamasha men teatr tarlanynyń» jambasy Almatydaǵy Keńsaı zıratynda jerge tımek.