Qazaq jurtshylyǵy syrshyl aqyn Tumanbaı Moldaǵalıevti aqtyq saparǵa shyǵaryp saldy

Qaraly jıynda alǵashqy bolyp sóz alǵan Qazaqstan Jazýshylar Odaǵynyń tóraǵasy Nurlan Orazalın aqynnyń ómirine, artyna qaldyrǵan eńbekteriniń mańyzdylyǵyna toqtalyp ótti. «Aqyn búkil sanaly ómirin, ǵumyryn óleńge arnaǵan, qazaq óleńiniń álemdik deńgeıge kóterilip, qazaq jyrynyń abyroıy men mártebesin asqaq bıikke kóterý úshin shabytyn da, oıyn da arnaǵan. Úlkender Tumash dese, kishileri Tumaǵa dep ár óleńin saǵynyp, ár jyryna qol soǵyp, árbir ánin kókeıinde tumardaı ǵyp túıgen Tumanbaı Moldaǵalıev aramyzdan baqıǵa attandy», - dedi N.Orazalın.

Sondaı-aq qoshtasý barysynda QR Prezıdenti Ákimshiligi jetekshisiniń orynbasary Baǵlan Maılybaev T.Moldaǵalıevtiń jarqyn beınesim en onyń baı rýhanı murasy ultymyzdyń jadynan eshqashan óshpek emes dep jurtshylyqqa kóńil bildirip, QR Prezıdenti Nursultan Nazarbaevtyń arnaıy joldaǵan jedelhatyn oqyp berdi.

«Halqymyzdyń asa kórnekti aqyny, Memlekettik syılyqtyń laýreaty Tumanbaı Moldaǵalıev aǵamyzdyń ómirden ótýine baılanysty aýyr qaıǵylaryńyzǵa ortaqtasyp, kóńil aıtamyn. Qalyń eli Tumash dep erkeletken ardaqty azamat, ulttyq poezııamyzdyń órkendeýine ólsheýsiz úles qosqan jyr alyptarynyń úrkerdeı tobyna jatatyn sanaýly qaıratkerleriniń biri. Sezim men názik lırıkanyń teńdesiz sheberi Tumaǵańnyń óleńderi kóptegen júrekterge óshpesteı qonǵany shúbásiz. Jan dúnıeńdi úıirip, rýhyńdy asqaqtata biletin, shynshyl da, tákappar poezııasy bul kúnde ulttyq mádenıetimizdiń altyn qoryna, halqymyzdyń rýhanı baılyǵyna aınaldy. Qalamgerdiń ónegeli ómiri, jarqyn beınesi, ǵıbraty mol óleńderi óshpeıdi dep bilemin. Marhumnyń jatqan jeri jaryq bolyp, nurly da móldir jany beıishte shalqysyn demekpin», - delingen jedelhatta.

Ardaqty aqyn Almaty mańyndaǵy Keńsaı zıratyna jerlendi.