Qazaq jýrnalıstıkasynyń qara narlary marapattaldy
ASTANA. QazAqparat - Ońtústik shaharda Baılanys jáne aqparat qyzmetkerleri kúni qarsańynda jýrnalıstıka salasynyń maıtalmandaryna «Qazaq jýrnalıstıkasynyń qaıratkeri» ataǵy tapsyryldy.
Júldeni Qoǵamdyq ataqtar men marapattar jónindegi Respýblıkalyq keńes taǵaıyndady, dep jazady «Aıqyn» basylymy.
«Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq ustanymdary negizinde ulttyq kodty nyǵaıtý men ulttyq sanany órkendetý maqsatynda ári Buqaralyq aqparat quraldary qyzmetkerleriniń kásibı merekesi qarsańynda uıymdastyrylyp otyr. Jýrnalısterdiń resmı meıramynda bilikti tórtinshi bılik ókilderine qoǵamdyq negizdegi kásibı joǵary marapat tapsyrýdy jón kórdik»,- dep atap ótti Respýblıkalyq keńestiń tóraǵasy, «Prezıdent jáne halyq» gazetiniń bas redaktory Marat Toqashbaev.
«Qazaq jýrnalıstıkasynyń qaıratkeri» ataǵyn tórtinshi bılik aqsaqaldary, aǵa býyn ókilderi Sapabek Ásipuly, Sherhan Murtaza, Sarbas Aqtaev, Ýahap Qydyrhanuly, Ǵabbas Qabyshuly, Zákir Asabaev, Mamadııar Jaqyp, Bekbolat Ádetov, Faızolla Orazaev, Orysbaı Ábildaev, Nurmambet Qızatov, Beıbit Qoıshybaı, Nurlan Orazalın, Erjuman Smaıyl, Jarylqap Beısenbaıuly, Janat Elshibekov jáne Asqanbaı Erǵojaev ıelendi. Sonymen qatar aıtýly marapattyń medalin búgingi Buqaralyq aqparat quraldarynyń basshylary da keýdesine taqty. Atap aıtsaq, Naǵashybek Qapalbekuly, Kópen Ámirbek, Jumabaı Shashtaıuly, Nesip Júnisbaev, Rysbek Sársenbaı, Mereke Qulkenov, Janbolat Aýpbaı, Nurtileý Imanǵalıuly, Qalı Sársenbaı, Saǵatbek Medeýbekuly, Nurtóre Júsip jáne taǵy basqalary. Sondaı-aq áriptesimiz «QazAqparat» HAA shyǵarýshy redaktory Erlan Qojakeldıev te osy marapatqa ıe boldy.
