Qazaq jýrnalıstıkasynyń deńgeıi joǵary ekeni kúmánsiz – Qasym-Jomart Toqaev

NUR-SULTAN. QazAqparat – QR Prezıdenti Qasym-Jomart Toqaev «Qazaqstan» telearnasyna bergen suhbatynda qazaq jýrnalıstıkasynyń deńgeıi týraly pikir bildirdi, dep habarlaıdy QazAqparat tilshisi.

«Jalpy qazaq jýrnalıstıkasynyń deńgeıi tómen dep aıtýǵa bolmaıdy. Kerisinshe qazaq jýrnalıstıkasynyń deńgeıi joǵary ekeni kúmánsiz. Qańtar oqıǵalary kezinde aqparattyq vakýým boldy. Ony kásibı turǵyda daıyndalǵan lańkester, qylmyskerler óz múddesine paıdalandy. Internetti buǵattaýǵa májbúr boldyq. Bul – álemdik praktıka. Biraq, basqa da aqparat quraldarymyz bar ǵoı. Sodyrlar keıbir tele-radıo arnalardyń ǵımaratyn órtep, qıratty. Odan basqa aqparat quraldary úzdiksiz habar taratty. Eshqandaı shekteý bolǵan joq», - dedi Qazaqstan Prezıdenti.

Sondaı-aq, ol eldegi sóz bostandyǵyna toqtaldy.

«Al, baspasóz bostandyǵyna kelsek, bizde zań boıynsha tsenzýra joq. Aqparat erkindigin barynsha qamtamasyz etip jatyrmyz. Biraq, erkindik degen oıyńa ne kelse, sony aıtý emes. Kez-kelgen demokratııalyq elderde jalǵan aqparat taratqan adam jaýapqa tartylady. Men árbir jýrnalıst, eń aldymen, memleketshil azamat bolýy kerek dep sanaımyn. Osy oraıda N.Nekrasovtyń: «Aqyn bolý shart emes, azamat bolý – mindetiń» degen qanatty sózi bar. Sondyqtan árqaısymyz elimizdiń patrıoty bolýǵa tıispiz», -dedi Memleket basshysy.

Onyń sózine qaraǵanda, ár jýrnalsıt «Aıtylǵan sóz – atylǵan oq» degen halyq danalyǵyn nazarda ustaýy kerek.

«Osy rette, ókinishke qaraı, keıbir jýrnalıster jalǵan aqparat taratyp, eldiń múddesine qarsy jumys isteıdi. Qazirgi zamanda blogerler kóbeıip ketti. Olardyń keıbir áreketteri keri áser etedi. Bir blogerler jaqsy jazady. Al ekinshi bireýleri máseleniń baıybyna barmaı, zerttemeı, ústirt qaraıdy. Degenmen, azamattarymyz aq pen qarany ajyrata alady dep oılaımyn. Rasynda, aqparattyq «soǵys» búkil álemde bolyp jatqan úrdis. Sondyqtan, biz de oǵan beıimdelýimiz kerek», -dedi Qasym-Jomart Toqaev.