Qazaq jýrnalıstıkasyna tóngen basty qaýip - kásibı saýatsyzdyq - «Túrkistan» gazetiniń sarapshysy
ALMATY. 20 qarasha. QazAqparat - Bılik - qazaq jýrnalısteri úshin eń jabyq taqyryp. Bul týraly búgin Almatyda «Qazaqstannyń medıa naryǵy: ońtaıly basqarý jáne damytatyn tustary» degen taqyryppen ótip jatqan 5-shi medıa quryltaıda aıtyldy.
«Qazaq jýrnalıstıkasynyń damý jolyndaǵy basty kedergiler men kemshilikterdi jáne onyń sheshý joldaryn anyqtaý maqsatynda saýalnama júrgizdim. Oǵan respýblıkalyq jáne aımaqtyq basylymdardaǵy 100-den astam adam qatysty. Alǵashqy saýal - «Qazaq jýrnalıstıkasynyń damýyna ne kedergi?» dep ataldy. Oǵan 21 paıyzy - tsenzýrany, 17 paıyzy - memlekettik tildiń qaýqarsyzdyǵyn, 15 paıyzy - kásibı biliktiliktiń tómendigin, 14 paıyzy - jeke basqa tán kemshilikterdi, taǵy 14 paıyzy -qarjylyq táýeldilikti, 10 paıyzy - báseke joqtyǵyn, al 9 paıyzy esh kederginiń joqtyǵyn aıtty», - deıdi «Túrkistan» gazetiniń sarapshysy Názııa Joıamergenqyzy.
Onyń aıtýynsha, saýalnamaǵa qatysýshylar kedergiler qataryna jýrnalıstıkanyń basty maqsatyn túsinbeýshilik, kásibı quraldardy paıdala bilmeý; jýrnalıstıkany saıasatpen, aqyndyqpen, jazýshylyqpen shatastyrý, jýrnalıstıka erejeleri men etıkalaryn saqtamaý; avtorlyq quqyqty saqtamaý; qarjylyq-materıaldyq tapshylyq, jarnamanyń azdyǵy, bıliktiń orystildi BAQ ókilderin ish tartýy; aqparat alý mádenıetiniń qalyptaspaýy; bárine bas redaktorlar kináli; sheteldik aqparattyq ekspansııa; memlekettik tapsyrysqa táýeldilik; quqyqtyq turǵydan jýrnalısterdiń qorǵansyzdyǵyn da ataǵan. Qazaq jýrnalısteri úshin jabyq taqyrypqa 28 paıyzy - bılik; 23 paıyzy - jabyq taqyryp joq, 19 paıyzy - saıasat pen ekonomıka; 19 paıyzy - basqa; 9 paıyzy ultaralyq máseleler dep kórsetken. Sondaı-aq 59 paıyzy qazaq jýrnalısteriniń arasynda kásibiı birlik joq dese; 27 paıyzy bar, biraq az; 13 paıyzy bar; 4 paıyzy bilmeımin degendi aıtqan.
N.Joıamergenqyzynyń sózine qaraǵanda, qazaq jýrnalısteriniń básekelestik qabiletin arttyrý úshin kásibı biliktilikti (37 paıyz), qarjylyq qoldaýdy (34 paıyz) kóterý kerek degendermen qatar, báseke bar (5 paıyz) deýshiler de bolǵan. Al qazaq jýrnalıstıkasyna tóngen qaýipti 42 paıyzy - kásibı saýatsyzdyqpen, 18 paıyzy - memlekettik tilmen, 15 paıyzy táýeldilikpen baılanystyrǵan.
