Qazaq jýrnalıstıkasy táýelsizdik jyldarynda ulttyq qozǵalystyń, ulttyq partııanyń rólin atqaryp keldi - E.Qarın
ASTANA. 29 qańtar. QazAqparat - Qazaq jýrnalıstıkasy, qazaq basylymdary táýelsizdiktiń jıyrma jyly ishinde shynynda ulttyq qozǵalystyń, ulttyq partııanyń rólin atqaryp keldi. Bul týraly búgin "Amanat" pikirsaıys klýbynyń búgingi qazaq basylymdaryna arnalǵan jıynynda "Nur Otan" HDP-niń atqarýshy hatshysy Erlan Qarın málim etti.
"20 jylda kún tártibindegi ulttyq máselelerdiń bolýy shyn mánisinde negizinen qazaq jýrnalıstıkasyna arqa tirep keldi. Qazaq jýrnalıstıkasy, qazaq basylymdary táýelsizdiktiń jıyrma jyly ishinde shynynda ulttyq qozǵalystyń, ulttyq partııanyń rólin atqaryp keldi. Sebebi elimizde naqty bir zııatker, ınstıtýtsıonaldy formasy, saıası birlestik bolmaǵan jaǵdaıda qazaq basylymdarynda osy ýaqytta til máselesi, din máselesi, jer máselesi, keıingi ýaqyttarda jıi kóterilip júrgen latyn qarpi, jalpy ózekti máselelerdiń barlyǵy qaıtadan kóterilýiniń arqasynda ǵana kún tártibinen túspeı otyrdy. Onyń árdaıym aıtylyp otyrýynyń nátıjesinde ǵana sheshimin taýyp jatty. Ol shyn mánisinde belgili bir kúshterdiń nemese saıası uıymdardyń emes, qazaq basylymdarynyń betterinde kórinis tabýynan boldy" - dep atap ótti ol.
Onyń aıtýynsha, búgingi kúni elimizde 2532 gazet-jýrnaldar bar bolatyn bolsa, sonyń 500-deıi ǵana qazaq tilinde jaryqqa shyǵady. "Kishkentaı ǵana san qarap otyrsaq. Alaıda osy san jaǵynan az qazaq basylymdarynyń arqasynda qazaq qoǵamynda kún tártibindegi ulttyq máseleler oryndalyp keldi", - dep túıdi sózin E.Karın.
Shara Alashtyń tili, kózi, hám qulaǵy bolǵan "Qazaq" basylymynyń 100 jyldyǵyna arnalyp otyr.
