Qazaq jýrnalıstıkasy orys nemese basqa da jýrnalıstıkadan kesh qalyp keledi degen pikirmen kelispeımin - A.Smaıyl
ASTANA. Tamyzdyń 16-sy. QazAqparat /Gúlmıra Álıakparova/ - Qazaq jýrnalıstıkasy orys nemese basqa da jýrnalıstıkadan kesh qalyp keledi degen pikirmen kelispeımin. Ondaı oıdy qazaq radıosy men teledıdardy, qazaq basylymdaryn oqymaıtyn azamattar aıtady dep sanaımyn. Bul pikirin búgin Astanada bastalǵan «Qalamger - Azamat» ІІІ respýblıkalyq jas tilshiler forýmynda QR Parlamenti Májilisiniń depýtaty, jazýshy Aldan Smaıyl bildirdi.
Qazaqstannyń barlyq óńirinen bas qosqan jas tilshilerdiń aldynda sóz sóılegen A.Smaıyl, jýrnalıstıkanyń, onyń ishinde qazaq jýrnalıstıkanyń qazirgi jaǵdaıyn tilge tıek etti.
«Meniń kózim jetkeni, buqaralyq aqparat quraldary salasy - bul ámbebap sala. Jýrnalıstıkanyń aralaspaıtyn salasy joq, olar ekonomıst te, saıasatker de, agronom, shahter, memlekettik qyzmetshi jáne taǵy basqasy bola bilýi kerek. BAQ halyqtyń, barlyq salada eńbek etip jatqan adamdardyń nazaryn aýdarta alatyn sala», - deıdi ol.
A.Smaıyl, qazirgi qazaqstandyq jýrnalısterdiń sheberlikterine joǵary baǵa beretinin atap óte kele: «Qazir ásirese, qazaq jýrnalıstıkasynyń jetistigin kórýge bolady. Birinshiden, aqparattyń ushqyrlyǵy jáne tez berilýi. Ekinshiden, qysqa merzimde berilip otyrǵan aqparatyna taldaý jasaı bilýi jáne úshinshiden tek qana Qazaqstannyń sheńberinde ǵana emes, TMD nemese odan da joǵary deńgeıde oılaı alýy. Osy úsh qasıet - qazaq jýrnalıstıkasyna tán», - dedi Májilis depýtaty.
A.Smaıyl, Qytaı Halyq Respýblıkasyndaǵy buqaralyq aqparat quraldarynyń strategııasyn negizge ala otyryp, qazaq aqparattaryn Qazaqstannyń óz ishinde taratý jáne buqaralyq aqparat quraldaryn shet elderde Qazaqstannyń oń bedelin qalyptastyrý maqsatynda qoldaný strategııasyn jasaý qajettigin alǵa tartty. Jáne forýmǵa qatysýshy jas qalamgerlerge osy týrasynda baǵdarlama ázirleý máselesin oılastyrýdy usyndy.
