Qazaq jýrnalısteriniń kásibı deńgeıi damyǵan elderdiń jýrnalısterinen kem emes - Qasym-Jomart Toqaev
ASTANA. QazAqparat - QR Parlamenti Senatynyń tóraǵasy Qasym-Jomart Toqaev el Táýelsizdiginiń 25 jyldyq mereıtoıy qarsańynda BAQ ókilderin quttyqtap, joǵary zań shyǵarýshy organnyń jumysyn jazyp-kórsetýde belsendilik tanytqan birqatar tilshilerdi alǵys hatpen marapattady, dep habarlaıdy QazAqparat.
«Elbasynyń kóregen saıasatynyń arqasynda Qazaqstan BUU Qaýipsizdik keńesiniń múshesi boldy. ıAdrolyq qarýdan bas tartqan tuńǵysh el retinde búkil álemde úlken abyroıǵa ıe boldy. Halqymyzdy dúnıejúzine pash etti. Qazaqstandaǵy ulttyq yntymaq pen ultaralyq tatýlyqty dúnıejúzi úlgi tutady. Álemdegi eń damyǵan elderdiń qataryna ený týraly Prezıdenttiń uzaqmerzimdi strategııasyn júzege asyrýda elimizdiń egemendigin jáne memleketimizdiń turaqty damýyn qamtamasyz etýde ulttyq zańnamany qalyptastyrýda Parlament tabandy jumys isteýde», - dedi Senat tóraǵasy.
Osy rette ol 25 jyl ishinde Qazaqstan Parlamenti memlekettiń qarqyndy damýyna qajetti barlyq zańdardy qabyldaǵandyǵyn basa aıtty.
«Sol zańdardyń mán-mańyzyn halyqqa jetkizý jolynda Sizderdiń eńbekterińiz óte mol. Táýelsizdik jyldarynda Qazaqstan jýrnalıstıkasy aıtarlyqtaı shyńdalyp, jetildi. Aqparat quraldarynyń qyzmeti quqyqtyq jaǵynan tolyq qamtamasyz etilgen. Búginde qoǵam qundylyqtary jáne basty baǵdarymyzdy halyqqa nasıhattaýda, yntymaq-birligimizdi nyǵaıtýda jýrnalısterdiń róli aıryqsha. Qazaq jýrnalısteriniń kásibı deńgeıi basqa damyǵan memleketterdiń jýrnalısterinen kem emes. Al kóptegen ózekti qoǵam máseleleri boıynsha odan da joǵary dep kúmánsiz aıtýǵa bolady. Sizderdiń eńbekterińizdi men, Senat tóraǵasy retinde óte joǵary baǵalaımyn. Barshalaryńyzdyń qajyrly eńbekterińizge tolaıym tabystar tileımin», - dedi Qasym-Jomart Toqaev.
