Qazaq jýrnalısteri jańa medıa tehnologııalardy ıgerýde
ALMATY. 27 mamyr. QazAqparat /Erbol Azanbek/ - Búgin Almatyda «Minber» jýrnalısterdi qoldaý ortalyǵynyń uıymdastyrýymen «Qazaq jýrnalıstıkasynda jańa medıa tehnologııalaryn tájirıbege endirý» atty semınar-trenıng ótip jatyr.
Trenıngke Qazaqstannyń ár oblysynan 25-ke jýyq jýrnalıster men jańa medıaǵa qyzyǵýshylyq bildirgender qatysýda. Olarǵa belgili jýrnalıst, blogshylar, «Minber» JQO-nyń ókilderi Esengúl Kápqyzy, Ashat Erkimbaı, Baqytgúl Salyqova, Álııa Sembaı, «WikiBilim» qoǵamdyq birlestiginiń ókili Raýan Kenjehanuly, kerekinfo.kz jobasynyń avtory Arshat Orazov, AQSh-tyń Ogaıa ýnıversıteti Medıa, óner jáne ony zertteý fakýltetiniń professory, ǵylym doktory Devıd Moýld ınternet salasy men ınternet jýrnalıstıka boıynsha dárister ótkizedi.
Atap aıtqanda, Internettegi quqyqtyq jáne lıngvıstıkalyq qaýipsizdik, Qazaqstanda ınternet salasynyń quqyqtyq rettelýi, Internettegi saraptamalyq maqala jazý úlgileri, Qazaqsha Wikipedia: múmkindikteri men erekshelikteri, Blog ashý, jazba ornatý, sýret qoıý, únhabarǵa kirispe, Jýrnalıstik etıka, ınternetpen, áleýmettik jelilermen jumys taqyryptary úıretiledi. Eki kúnge sozylatyn trenıng-semınar EQYU, Soros qory men QMEBI-diń qoldaýymen ótkizilýde.
