«Qazaq jýrnalıster klýby» Qyrǵyzstan saıası partııalarymen júzdesti

Qyrǵyzstanda jaqynda ǵana ótken saılaý nátıjesinde eldiń jetekshi 5 partııasy basym daýystarǵa ıe bolǵan-dy. Atap aıtsaq, «Atajurt» (8,88%), QSDP (8,04%), «Ar-namys» (7,74%), «Respýblıka» (7,24%) jáne «Ata meken» (5,6%) partııalary Parlamenttegi 120 oryndy bólisti. Atalmysh partııa jetekshileri qazaq jýrnalısterimen kezdesý kezinde endigi maqsattary - Parlamentte saıası koalıtsııa qurý jáne osy maqsatta ázirge tek kelissózder júrgizilip jatqandaryn jetkizdi.

«Eń aldymen biz kúshti Parlament qurýǵa tıispiz. Buǵan deıin biz 2 prezıdenttik basqarýdy bastan ótkerdik. Ekeýi de eldi tyǵyryqtan alyp shyǵa almady. Endigi qurylyp otyrǵan parlamenttik basqarý júıesi tolyǵymen demokratııalyq ustanymdarǵa negizdelgen. Al Parlamenttegi partııalardyń koalıtsııa qurý máselesine qatysty ázirge tek kelissózder júrgizilýde», dedi «Ata meken» partııasy tóraǵasynyń orynbasary, Qyrǵyz Respýblıkasy Parlamenti depýtaty Ravshan Jıendikov.

Qalǵan «Ar-namys» jáne Qyrǵyzstan sotsıal-demokrattar partııalarymen kezdesýde de partııalardyń koalıtsııa qurý máseleleri sóz boldy. «Qandaı jaǵdaı bolmasyn, bizdiń eń basty maqsatymyz - kúshti memleket qurý jáne eldiń áleýmettik-ekonomıkalyq deńgeıin kóterý», deıdi «Ar-namys» partııasy tóraǵasynyń orynbasary Aqylbek Japparov.