Qazaq jigiti Mońǵolııa quramasy tarıhynda tuńǵysh bolyp het-trık jasady
ASTANA. QazAqparat - Qazaq jigiti Janserik Marathanuly Mońǵolııa fýtbol tarıhynda resmı oıyndarda birinshi bolyp het-trık jasady, - dep habarlaıdy Vesti.kz.
Buǵan deıin Mońǵolııa fýtbol tarıhynda meıli jastar bolsyn, meıli Ulttyq qurama sapynda bolsyn, eshkim resmı kezdesýlerde úsh gol soǵyp, het-trık jasamaǵan.
Janserik Marathanuly het-trıkti Azııa birinshiliginiń jastar arasyndaǵy (19 jasqa deıingi) irikteý kezeńinde Sıngapýr quramasyna qarsy oıynda jasady.
Al oıyn jalpy 4:2 esebimen mońǵol jastarynyń jeńisimen aıaqtaldy. Kezdesý barysynda Mońǵolııa quramasy 0:2 esebimen jeńilip jatqan. Sodan soń Marathanuly komandasyna jeńiske jetýge kómektesti.
Birinshi taımnyń sońynda ol penaltıdi sátti oryndasa, ekinshi taımda qarsy shabýyldan, al úshinshi goldy oıynnyń aıaqtalýyna úsh mınýt qalǵanda soqty. Oıyn sońynda Sıngapýr quramasynyń eki fýtbolshysy qyzyl qaǵaz alsa, qosalqy quramda otyrǵan taǵy bir oıynshy alańnan qýyldy.
Osylaısha Mońǵolııa quramasy san basymdyǵyn sátti paıdalanyp, qosymsha ýaqytta tórtinshi goldy soqty. Degenmen bul jeńis Mońǵolııa jastar quramasyn kelesi kezeńge alyp shyqpady. Óıtkeni buǵan deıin olar Japonııa quramasy (0:7) men Taılandtan (2:5) jeńilip qalǵan edi.
18 jastaǵy Janserik Marathanuly qazirgi ýaqytta eldiń bas shahary Ulanbatyr qalasynda turyp, jergilikti "Deren" klýbynda óner kórsetedi. Ótken jyly ol Mońǵolııa ulttyq quramasyna da shaqyrtý alyp, qurama tarıhyndaǵy eń jas oıynshy atandy. Biraq ulttyq qurama sapynda áli birde-bir kezdesýge qatysqan joq.
