Qazaq jigiti Amerıkada qaraqshylarǵa toıtarys berip, qarýlaryn tartyp alǵan

ASTANA. QazAqparat – Áleýmettik jelilerde AQSh-ta júrgen qazaqstandyq Oljas Qaldybaevqa qaraqshylyq shabýyl jasalǵany, qazaq jigiti qylmyskerlerge toıtarys berip, qarýlaryn tartyp alǵany týraly vıdeo tarap jatyr, dep habarlaıdy QazAqparat.

Bolǵan oqıǵany Oljas Qaldybaev Instagram-daǵy paraqshasynda baıandap, oqıǵa ornynan foto, vıdeolar júktedi.

Aıtýynsha, tapansha men myltyq ustaǵan úsh jigit sómkesin tartyp alǵan. Biraq keıin olardyń birin qýyp júrip ustaǵan jáne ony jibermeı otyryp polıtseılerdi kútken. Barlyǵyn vıdeoǵa túsirip alǵan. Sol kezde qaraqshynyń eki dosy ony bosatý úshin qaıta oralǵan. Qoldarynda pıstolet bolǵan. Olar qazaq jigitine shabýyl jasaǵan. Alaıda, O.Qaldybaev qarsylyq kórsetip, qarýdy tartyp alǵan. Urylar qashyp ketken.

Kóp uzamaı polıtseıler jetken. Qaraqshylardy izdeýge 6 polıtsııa kóligi men tikushaq jumyldyrylǵan.

Polıtseılerdiń biriniń sózinshe, qazaq jigiti qaraqshylardan pıstolet pen avtomat tartyp alǵan, ózderin uryp-soqqan, biriniń tisin syndyrǵan. «Mundaıdy Amerıkada buǵan deıin eshkim kórmegen», - deıdi er jigittiń batyldyǵyna tánti bolǵan tártip saqshysy.