Qazaq jerine kelgen qaı ulttyń da joly boldy – Elbrýs Tımaev
Jıyn barysynda ár birlestiktiń jetekshileri qoǵamdyq jumystaryna toqtalyp, qazaq halqyna alǵys aıtty. Minberge shyqqan «Vaınah» sheshen-ıngýsh ortalyǵynyń jetekshisi Elbrýs Tımaev sózin «Qazaq halqyna rızamyn!» - dep bastady.
«Kezinde bizdiń týys-týǵandarymyz «halyq jaýy» bolyp, jan-jaqqa qashty. Bizdi vagondarmen Qazaqstanǵa ákep kelgende, qıyndyqtyń bastalatynyn boljadyq. Biraq bári kerisinshe bolyp shyqty. Qazaqtar bizdi úılerine kirgizip, qoltyǵyna tartyp, bir úzim nanyn bólip berdi. Eń bastysy, osy azyp-tozyp kelgen halyqty qorlamaı, qurmetpen qarady, qaıǵysyn bólise bildi. Al qazir Elbasy bastap, Memleket basshysy jalǵap júrgizip otyrǵan saıasat cheshender men ıngýshtarǵa óz ulttyq dástúrin, tilin, dinin umytpaq túgel, ony damytýǵa múmkindik berip otyr. Mundaıdy baǵalamaýǵa, alǵys aıtpaýǵa bola ma? Qazaq jerine kelgen qandaı ulystyń da joly boldy, baǵy ashyldy. Elmen birge olar da damydy, baqytty kúnder keship otyr. Al biz endi qazaq memleketin Máńgilik el etýge birigip, kúsh salýymyz kerek. Osy oıdy urpaǵymyzdyń boıyna sińirýimiz qajet», - dedi Elbrýs Tımaev.
Birlestik jetekshisi Qordaıdaǵy jaǵdaıǵa baılanysty kózqarasyn bildirip, birlikti saqtaýdyń mańyzdylyǵyn aıtty.
«Sonaý toqsanynshy jyldardyń qıyndyǵyn barlyǵyńyz bilesizder. Qıyn zamanda Elbasymyzdyń sońynan erip, damýdyń dańǵyl jolyna tústik. Elimizdi meken etken barsha ult birlikte ómir súrip keledi. Osy baǵyttan adaspaı, ilgerileı berýimiz kerek. Eń bastysy, ózimizdi, urpaǵymyzdy durys tárbıeleýimiz kerek. Árıne, qoǵam bolǵan soń, usaq-túıek kıkiljińsiz bolmaıdy.Ony órshitpeı, tez arada kelisimge keler jol izedp tabýdy úıreneıik. Qordaıdaǵy jaǵdaı bárimizge sabaq boldy. Tek arandatýshylardyń sońyna ermeıik. Qazaqstanda turatyn bir adamnyń shashy jerge tússe, oǵan bárimiz jaýaptymyz. Sondyqtan bir úıdiń balasyndaı, tatý-tátti ómir súrýge, bir-birimizge qulas asýǵa úıreneıik», - dedi ol.
Jalpy Qazaqstan halqy Assambleıasy oblystyq fılıalynyń qatysýymen byltyr túrli deńgeıde alty júzden astam qaıyrymdylyq is-sharasy ótkizilgen. Birlestikterdiń kórsetken qaıyrymdylyq kómek somasy eki júz mln teńgeden asty. Assambleıanyń Analar keńesi qaıyrymdylyq is-sharalar kúntizbesi aıasynda «Meıirimdi ister kúni» aktsııasyn ótkizýge bastama jasady. Medıatsııa ınstıtýtyn damytý úshin óńirde 1 oblystyq medıatsııa kabıneti jumys isteıdi.
Etnomádenı birlestikter janynan 10 shyǵarmashylyq ujym, tórt jastar qanaty jáne «Jańǵyrý joly» jastar qozǵalysynyń fılıaly ashyldy.
