Qazaq jerinde Amýr jolbarystaryn jersindirý týraly memorandýmǵa qol qoıylmaq
ASTANA. QazAqparat - «EKSPO-2017» halyqaralyq kórmesindegi Gollandııa pavılonynda 8 qyrkúıekte Qazaqstan Respýblıkasynyń Aýyl sharýashylyq mınıstrligi men Reseı federatsııasynyń Jabaıy tabıǵattyń búkilálemdik qory Qazaqstan jerine Amýr jolbarystaryn jersindirýge qatysty memorandýmǵa qol qoıady, dep habarlaıdy «QazAqparat» HAA tilshisi.
Bul týraly búgin QR AShM Orman sharýashylyǵy men janýarlar dúnıesi komıteti tóraǵasynyń orynbasary Qaırat Ústemirov habarlady.
«Bizde 2012 jyldan beri Reseıdegi «Jabaıy tabıǵattyń búkilálemdik qorymen» (JTBQ) jolbarysty Qazaqstan jerine jersindirýge baǵyttalǵan baǵdarlama jumysy talqylanyp keledi. Ózderińiz biletindeı, bul másele BAQ arqyly birneshe márte kóterilgen. 2014 jyldyń mamyr aıynda qazaqstandyq tarap pen álemdik sarapshylardyń qatysýymen Almatyda semınar uıymdastyrylyp, qazaq jeriniń qaı óńirine jersindirý máselesi talqylanǵan edi. Bul baǵdarlama bizdiń AShM men Reseıdiń JTBQ-nyń seriktestigindegi tyń kezeń bolmaq. Osy maqsatta «EKSPO-2017» halyqaralyq kórmesi aıasynda Gollandııa pavılonynda 8 qyrkúıekte biz Reseıdegi JTBQ-men jolbarysty Qazaqstan jerine jersindirý boıynsha memorandýmǵa qol qoıǵaly otyrmyz», - dedi Qaırat Ústemirov.
Komıtettiń jaýapty qyzmetkeriniń aıtýynsha, Qazaqstan jerine jolbarysty jersindirý jumysy uzaq ýaqytty alady. Seriktestik aıasynda baǵdarlamanyń birinshi kezeńi 15 jyldy qamtyp, erekshe qorǵalatyn aýmaq tańdalyp alynyp, ol aýmaqtyń ekologııalyq júıesi retke keltirilmek.
«2018 jyldyń bekitilgen bıýdjeti boıynsha, Balqash óńirinde arnaıy rezervat qurý týraly másele sheshildi. Halyqaralyq sarapshylardyń oıynsha, Turan jolbarysyn Qazaqstanda jersindirýge múmkindik bar. Biraq Turan jolbarystary quryp bitkendikten, oǵan bıologııalyq turǵyda uqsas Amýr jolbarystaryn jersindirmekpiz. Dese de, olardy jibermes buryn Qyzyl kitapqa engizý kerek. Bul baǵdarlamany júzege asyrý aıasyndaǵy JTBQ barlyq ǵylymı zertteýlerdi qarjylandyratyn bolady», - deıdi Qaırat Ústemirov.
