Qazaq jazýshylary týraly kórkem fılm jaryqqa shyqty
NUR-SULTAN.QazAqparat - 6 qyrkúıek kúni Elordamyzda «Habar» Agenttiginiń tapsyrysymen túsirilgen, rejısser Murat Bıdosovtyń «Qalamger» dramasynyń tusaýkeseri ótti, dep habarlaıdy «Habar» agenttigi.
Kórkem fılmniń stsenarııin - Serjan Zákeruly jazǵan.
Kartınada ótken ǵasyrdyń 70-80-jyldarynda ómir súrgen qalamgerlerdiń ómiri men shyǵarmashylyǵy sýretteledi. Sol zamandaǵy dúıim jurttyń baryn baptap, joǵyn joqtaýmen júrgen qarymy mol qazaq jazýshylarynyń bastan keshken náýbetteri, zaman men adam aǵymyndaǵy qarama-qaıshylyqtar, bılik pen buqara arasyndaǵy baılanys osy fılmge arqaý bolǵan.
«Jazýshylar Odaǵynyń bıik minberinde partııanyń jalyndy úndeýleri jarııalansa, Jazýshylar úıiniń irgesindegi «Qalamger» dámhanasynda aıtylatyn áńgimelerdiń aýany tipti basqa bolatyn. Kompartııa nusqaýlarynyń kúshi júrmeıtin, tsenzýranyń qamyty qyspaıtyn, jazýshylardyń oıyn ashyq aıtyp, ázili men astarly áńgimesi, qaljyńy men qaǵytpasy qatar júretin «Qalamger» dámhanasy sol kezdegi qoǵamnyń shynaıy bet-perdesiniń sımvoly retinde alynyp otyr. Atalmysh drama bir jaǵy - qolyna qalam ustaǵan jazýshy qaýymdy meńzese, astarly maǵynasynda qalamger qaýymnyń táýelsizdikke umtylǵan bulqynysy, ishine syımaǵan sherlerin tarqatatyn oryn - «Qalamger» dámhanasy jaıynda bolady», - deıdi kartınanyń rejısseri Murat Bıdosov.
Oqıǵa jelisi boıynsha Alash ádebıeti taqyrybynda maqala jazyp kózge túsken Sátjan esimdi jas jazýshy belgili professordyń shaqyrýymen Almatyǵa keledi. Jazýshylar odaǵyna jumysqa ornalasyp, professordyń jetekshiligimen atyn ataýǵa tıym salynǵan Alash ádebıetiniń aqtańdaq betterimen tereńdeı tanysyp, ǵylymı dısertatsııasyn jazýǵa kirisedi. Jazýshylar arasynda Ortalyq Komıtettiń kózi men qulaǵy bolyp júretinder Sátjannyń ár basqan qadamyn ańdyp, onyń isine barynsha tosqaýyl qoıady.
Jalpy fılm ómirde bolǵan adamdardyń prototıpteri arqyly, olardyń basynan keshken naqty oqıǵalaryna súıene otyryp sol dáýirdiń tynys-tirshiligin kórsetedi.
«Týyndy keıipkerleriniń kópshiligi tarıhı tulǵalar. 70 jyldarda ómir keshken aqyn-jazýshylar. Bul tarıhı oqıǵalar men shynaıy adamdardyń basynan keshkenderi bolǵanymen, kórkem týyndyǵa tán oqıǵa jelisi de qatar órbıdi. Tarıhı tulǵalarmen qatar, kórkem obrazdar da qosylǵan. Týyndydaǵy bas keıipker Sátjan óz dáýirindegi qalamger qaýymynyń jıyntyq obrazy bolsa, oǵan qarsy turatyn jaǵymsyz keıipker de sol dáýirdegi partııanyń soıylyn soqqan, ýaqyttyń qurbany deýgede bolady» - deıdi «Qalamger» fılminiń stsenarıı avtory Serjan Zákeruly.
Fılmge kórnekti jazýshy Dýlat Isabekov jáne aqyn Baqyt Bedelhandar keńesshi retinde tartylyp, týyndynyń jalpy mazmuny men kórkemdik talaptary sol kisilerdiń súzgisinen ótken.
Kartınada basty rólderdi Baǵdaýlet Shaımahan, Jalǵas Tolǵanbaı, Nargız Altaıbaı, Ergenbaı Abýev, Dosjan Janbotaev, Baltabaı Seıitmamytov, Kenen Aqúrpekov, Aıdar Amanbaı jáne t.b. akterlar somdaıdy.
Aıta keteıik, týyndy 12 qyrkúıekten bastap elimizdiń kınoteatrlarynda kórsetiledi.
Dramanyń treılerin myna silteme arqyly kóre alasyz.
