Qazaq jazýshysynyń kitaptary muhıt asyp, AQSh-tyń 31 shtatynan bir-aq shyqty
ShYMKENT. KAZINFORM — Shymkenttik jas aqyn, jazýshy ári aýdarmashy Súndet Seıitovtiń týyndylary halyqaralyq deńgeıde tanylyp, AQSh jáne Aýstralııanyń eń bedeldi akademııalyq jáne qoǵamdyq kitaphana qorlarynyń katalogyna resmı túrde qabyldandy.
Qazaqstandyq avtordyń kitaptary búginde muhıttyń arǵy betindegi zertteýshiler men oqyrmandardyń ıgiligine aınalyp otyr.
Eshqandaı demeýshisiz baǵyndyrylǵan Amerıka naryǵy Súndet Seıitovtiń málimdeýinshe, bul jetistikke jetý úshin ol birneshe jyl boıy halyqaralyq baspa isi men kitap taratý platformalaryn óz betinshe zerttegen. Ol eshqandaı memlekettik nemese jeke baǵdarlamalardyń qarjylyq qoldaýyna súıenbeı, júzdegen hat jazyp, kóptegen bas tartýdy bastan ótkergen.
Nátıjesinde, avtordyń aǵylshyn tiline aýdarylǵan «Unforgotten» («Umytpas») óleńder jınaǵy, «Drone Show» («Dron shoý») romany jáne basqa da eńbekteri (jalpy sany 3 kitap): AQSh-tyń 31 shtatyndaǵy jáne Vashıngton (Washington, D.C.) federaldyq okrýgindegi 198 iri kitaphana júıesiniń katalogyna endi. Bul jeliler jalpy eseppen alǵanda Amerıka boıynsha, 2 myńnan astam kitaphana fılıalyn qamtıdy.
Álemdik deńgeıdegi qos alyp
Kalıfornııa jáne Aýstralııa ulttyq ýnıversıtetteri Jazýshy shyǵarmashylyǵyndaǵy eń mańyzdy belesterdiń biri — onyń «Unforgotten» («Umytpas») atty óleńder jınaǵynyń álemdegi eń bedeldi eki birdeı joǵary oqý ornynyń resmı kitaphana qoryna qabyldanýy boldy.
Olar: University of California (Kalıfornııa ýnıversıteti, AQSh) — 40 mıllıondyq kitap qory bar Amerıkanyń eń baı ári kóne akademııalyq kitaphanalarynyń biri. The Australian National University (Aýstralııa ulttyq ýnıversıteti, ANU) — Álemdik QS reıtınginde úzdik 30 ýnıversıtettiń qataryna kiretin jahandyq ǵylym ordasy.
Jınaqqa avtordyń estelik, Otan, mahabbat, senim jáne qıyndyqtarǵa qarsy turý (aman qalý) taqyryptaryn arqaý etken fılosofııalyq jyrlary engen.
Kitaptar Aýstralııa kontınentine de jetti
Akademııalyq ortadan bólek, Súndet Seıitovtiń shyǵarmasy Aýstralııadaǵy City of Belmont — Ruth Faulkner Public Library qoǵamdyq kitaphanasynyń qoryna resmı túrde qabyldandy.
Kitaphana júıesinde avtor esimi Seitov, Sundet dep tirkelip, jergilikti oqyrmandarǵa «Borrow» (kitaphanadan úıge alyp oqý) júıesi arqyly tolyqtaı qoljetimdi etildi.
— Qazaqstanda jazylǵan romannyń mundaı deńgeıdegi katalogtarda resmı bekitilýi — bul jeke meniń ǵana emes, zamanaýı qazaq ádebıetiniń de álemdik keńistiktegi kishkentaı bir jeńisi dep bilemin. Alda áli bes kontınent bar, taıaýda Eýropaǵa da jetemiz, — deıdi avtor.
Aıta keteıik, Súndet Seıitov — 1998 jyly týǵan qazaqstandyq aqyn, jazýshy, aýdarmashy. Qazaqstan Jazýshylar odaǵynyń jáne AQSh-tyń bedeldi AQSh Avtorlar gıldııasynyń «The Authors Guild» múshesi. Sonymen qatar, ol Qazaqstan jáne Ortalyq Azııa elderinen AQSh Avtorlar gıldııasyna múshe bolǵan jalǵyz qazaqstandyq qalamger. Túrli respýblıkalyq jáne halyqaralyq ádebı baıqaýlardyń laýreaty. Sondaı-aq, ol orta ǵasyrlyq shaǵataı tilindegi muralardy qazaq tiline aýdarýmen de aınalysady. Qazirgi tańda otbasymen Shymkent qalasynda turady.
Al, Avtorlar gıldııasy — 1912 jyly qurylǵan. Shtab-páteri Nıý-Iork qalasynda ornalasqan. Gıldııaǵa álemge áıgili Nobel, Býker, Pýlıtser syılyǵynyń laýreattary múshe. Atap aıtsaq, Nobel syılyǵynyń laýreaty Tonı Morrıson, Ernest Hemıngýeı, Perl Bak, Sol Belloý, Stıven Kıng jáne tanymal qalamgerler osy uıymnyń qatarynda.
Buǵan deıin kún saıyn 2 myńnan asa adam elorda kitaphanalaryna baratynyn jazǵanbyz.
