«Qazaq jaýyngeri Uly Otan soǵysy maıdanynda» atty kitap jaryq kórdi
Bul jınaqta, negizinen, tarıhı-qujattyq zertteý materıaldary toptastyrylǵan. Bul aqparatty atalǵan ınstıtýttan habarlady.
Eńbekte qazaqstandyqtardyń Uly Otan soǵysyndaǵy Jeńiske qosqan jalpy úlesi jaıynda kishigirim ózekti zertteýler men tarıhı- qujatttyq materıaldar jınaqtalyp, bes jyldyq soǵys tarıhynyń aqtańdaqtaryna jáne de soǵys jyldaryndaǵy halyqtyń aýyr turmys taýqymetine shynaıy baǵa berilgen.
Tarıhı qujattyq zertteý alǵysóz ben qorytyndydan jáne «Maıdan», «Tyl», «Uly Otan soǵysynyń ashylmaǵan betteri» dep atalatyn úsh bólimnen turady. Kitapta Molotov-Rıbbentrop paktisin, Ulybrıtanııa ókimetiniń basshysy, ser Ýınston Cherchılldiń, I.V. Stalınniń, V.M. Molotovtyń, A. Gıtlerdiń sóılegen sózderi keltirilgen.
Avtorlyq ujym qaıǵyly jyldar oqıǵasyn zertteý barysynda soǵys qımyldarynyń, áskerı sheshýshi is-qımyldardyń mańyzdy tustaryn tolyq ashýǵa kómektesetin materıaldardy kóbirek paıdalanǵan. Sonyń ishinde statıstıkalyq materıaldar, qatardaǵy soldattardyń, marshaldardyń estelikteri men kúndelikteri, atap aıtqanda B. Momyshulynyń, M. Ǵabdýllınniń, N. Ońdasynovtyń, Sh. Ermaǵambetovanyń, T.Áshimbaevtyń, Á.Nurshaıyqovtyń, J. Qızatovtyń, S.Nurmaǵambetovtyń, A.Qazaqbaevtyń, Q. Qaısenovtyń, S.Bekenovtyń estelikteri men paıymdaýlary berilgen.
Jınaqty ázirleý barysynda tarıh ǵylymynyń doktory J.Qydyralınanyń Atyraý oblystyq memlekettik muraǵatynan alynǵan qujattary jáne belgili ǵalymdar D.Mahattyń, T.Qalenovanyń, S.Muhamedjanovanyń, A.Maqypovtyń, S Kenjebaevtyń, K.Baıserkınniń, K.Ysqaqovtyń, A.Qashqynbaevtyń, T.Sadyqovtyń, B. Sharahymbaıdyń, T.Batyrhannyń ǵylymı zertteýleri, sonymen qatar B.Aıaǵan men H.Ábjanovtyń jeke muraǵatynan alynǵan qujattary jınaqqa engizilgen.
Áıgili qolbasshy, dańqty batyrymyz Baýyrjan Momyshuly: «Soǵys qazaq halqynyń tarıhyn kúrt ózgertken, burylys ákelgen, mıllıondaǵan otandastarymyzdyń arasynda óshpes iz, jazylmas jara qaldyrdy. Uly Otan soǵysy - tek bizdiń zamandastarymyzdy ǵana emes, adamgershilik, ıgilik sezimder turǵysynan bolashaqty da tolǵandyratyn taqyryp», - dep jazǵandaı, bul taqyryp búgingi tarıhtyń da, bolashaqtyń da kún tártibinen eshkim de alyp tastaı almaıtyn, eshqandaı oqıǵalar men kútpegen jaǵdaılar áserin tıgize almaıtyn taqyrypqa jatady. Soǵys aıaqtalǵannan beri arada kóp ýaqyt ótse de, taqyryp qazirgi zamandastarymyzdyń jadyn jańǵyrtyp, sezimderin tolqytady.
Osy turǵydan kelgende, Instıtýt ǵalymdary usynyp otyrǵan kitap Otan úshin, bolashaq urpaqtyń keleshegi úshin qurban bolǵan asyl aǵalarymyzdyń, apalarymyzdyń erligin, otansúıgishtigin qasterleıtin kez-kelgen búgingi jas urpaq úshin mańyzdy jınaq bolaryna kúmán joq.
