«Qazaq jaýyngeri» ata-jurtta alǵashqy aıqasyn ótkizedi
Qytaıdaǵy jekpe-jek keshterinde «Qazaq jaýyngeri» laqap atymen sharshy alańǵa shyǵyp júrgen qazaq boksshy Elshat Nyǵmatollauly (14-0-1, 5KO) Qazaqstannyń Táýelsizdik kúni merekesine oraı Astanadaǵy «Dáýlet» sport kesheninde ótetin kásipqoı boks keshinde synǵa túsedi.
Elshat Nyǵmatollauly 53,5 keli salmaqta judyryqtasady. Ol álemdik reıtıngtegi eń myqty 100 boksshynyń qataryna kirgen. Al Qytaıda óz salmaǵynyń kóshin bastap tur. Sondaı-aq osyǵan deıin WBO tujyrymy boıynsha Qytaı chempıony jáne WBC tujyrymy boıynsha Azııa chempıony ataǵyna qol jetkizip úlgergen tájirıbeli boksshylardyń biri.
Qandasymyz qazir elordada ótetin jekpe-jek keshine Almaty qalasynda daıyndalyp jatyr. Bul onyń ata-jurttaǵy alǵashqy aıqasy bolmaq.
Eske sala keteıik, Astanada ótetin kásipqoı boks keshi qazaqtyń belgili boksshysy Qanat Islam qurǵan «QAZAQ promotions» promoýterlik kompanııasynyń uıymdastyrýymen ótedi. Onda qandasymyz Elshat Nyǵmatollaulymen qatar Aıdar Sharybaev, Ashat Ýálıhanov, Abylaıhan Qusaıynov jáne Rýslan Myrsataevtyń sharshy alańǵa shyǵatyny týraly osyǵan deıin jazǵan bolatynbyz.
