«Qazaq jaýyngeri»: Astana tórinde jaqsy jekpe-jek kórsetemin
Salmaq ólsheý sharasy aldynda ótken baspasóz máslıhatynda, qandasymyz el táýelsizdigi merekesi qarsańynda ata jurtta jekpe-jek ótkizgeli otyrǵanyna qýanyshty ekenin jetkizdi.
«Búgin astanaǵa alǵash kelip otyrmyn, kóńil kúıim óte keremet! Sebebi, bul meniń qazaq elindegi alǵash ótkizgeli otyrǵan jekpe-jegim. Erteń, sharshy alańda sizderge jaqsy jekpe-jek kórsetemin»,- dedi Elshat.
Sondaı-aq, boksshy aldaǵy josparlarymen bólisti.
«Qytaıdaǵy jekpe-jekterimde Qytaı jáne Azııa chempıony atandym. Ázirge josparlarym kóp. Alda Qanat aǵamyz bastaǵan Qazaq Promotions-pen birge jumys jasap, bıik belesterdi baǵyndyratyn bolamyn»,- dedi qandasymyz.
Aıta keteıik, 16 jeltoqsan kúni Astana qalasyndaǵy «Dáýlet» sport saraıynda kásipqoı boks keshi ótedi. Elshat bul keshte jeńilip kórmegen ázerbaıjandyq boksshy Farıd Alıevpen (5-0-0,5KO) judyryqtasady.