Qazaq jastarynyń 82 paıyzy otbasyn basty qundylyq dep esepteıdi
ASTANA. QazAqparat - Halyqaralyq jastar forýmynda Qazaqstan Respýblıkasynyń Din isteri jáne azamattyq qoǵam mınıstri Nurlan Ermekbaev Memleket basshysynyń sóılegen sózderinen jastar ózderiniń ómirine qajetti mańyzdy baǵyt taba alatynyn aıtty, dep habarlaıdy mınıstrliktiń baspasóz qyzmeti.
Aqtaý qalasynda aýqymdy shara ótip jatyr. Halyqaralyq jastar forýmynyń jumysyna jastar uıymdarynyń ókilderi, stýdentter, Túrikmenstan, Iran, Reseı memleketteriniń jáne elimizdiń jas mamandary qatysýda.
Forým qatysýshylary aldynda sóz sóılegen mınıstr Nurlan Ermekbaev: «Qazaqstan Prezıdentiniń ónegeli sózderinen zamanaýı jas azamat ómirlik joly úshin mańyzdy ári paıdaly keńes ala alady. «Bolashaqqa baǵdar: rýhanı jańǵyrý» baǵdarlamasynda Elbasy ulttyq tarıh pen mádenıetti, dástúrlerdi umytpaı, zaman aǵymyna sáıkes jyljyp, pragmatıkalyq baǵytpen damýǵa keńes berdi. Osyny nazarǵa qoısańyz, alǵa qoıǵan maqsattaryńyzǵa jetýge bolady»,- dep atap ótti.
Nurlan Ermekbaev jastarǵa ómirde durys maqsat-mindetter qoıyp, paıdaly istermen aınalysýǵa keńes berdi.
«Jastar armanshyl keledi. Bul óte durys. Bireýler ómirde adamzatty jazylmas dertten saýyqtyrsam dep armandaıdy, bireýler jańa otyn túrimen jumys isteıtin energetıkalyq qondyrǵy oılap tapsam dep armandaıdy, bireýler bıznes ımperııa qursam dep armandaıdy. Al, bireýler aqyretti oılap, jaqyndaryn ýaıym-qaıǵyǵa salady. Sondyqtan, ómirde durys tańdaý jasańdar. Ómir súrýge umtylyńdar, armandańdar, ýaqytty bosqa ótkizbeı ómirde paıdaly ispen aınalasýǵa umtylyńdar. Ózderińniń parasattaryń men bilimderińe, erik-jigerlerińe senińder», - dep jastarǵa keńes berdi mınıstr.
Mınıstr keltirgen áleýmettik zertteýlerge sáıkes, el jastarynyń 82 paıyzy «januıany», 57,5 paıyzy «densaýlyqty», 32 paıyzy «dostyqty», 15,8 paıyzy «baqytty ómirdi», 15,5 paıyzy «mahabbaty» ómirdegi basty qundylyqqa jatqyzady eken.
Jastar saıasatynyń maqsaty- jastardyń rýhanı, mádenı turǵyda jetilip, bilim alýyna, kásibı damýyna memleket tarapynan qoldaý kórsetý. Memleket jastardyń ómirlik baǵyttary men olardyń áleýmettik deńgeıiniń joǵary bolýy jáne memlekettiń damýyna jastardyń óz úlesterin qosýy jolynda qajetti jaǵdaıdy jasaýda»,-dedi Nurlan Ermekbaev.
Sondaı-aq Din isteri jáne azamattyq qoǵam mınıstri Nurlan Ermekbaev jastardyń jumyspen qamtylýy baǵytynda elimizde birqatar memlekettik baǵdarlamalar bar ekendigin aıtty. Atap aıtqanda «Dıplommen aýylǵa», «Jastar tájirıbesi», «Ónimdi jumyspen qamtý jáne jappaı kásipkerlikti damytý» ( BJK 2020) baǵdarlamalary sátti júzege asýda. Budan bólek, óńirlerde jastardyń memlekettik baǵdarlamalar boıynsha biliktiligin arttyrý baǵytynda arnaıy jumys isteıtin 208 resýrstyq ortalyqtary bar.
