Qazaq-japon ǵylymı-gýmanıtarlyq bazasyn qurý usynyldy
ShYMKENT. QazAqparat - Búgin Ońtústik Qazaqstan oblysynyń ákimi Janseıit Túımebaev Qazaqstan Respýblıkasyndaǵy Japonııanyń Tótenshe jáne Ókiletti Elshisi Itıro Kavabatamen kezdesti, dep habarlaıdy óńir basshysynyń baspasóz qyzmeti.
Kezdesý barysynda Ońtústik Qazaqstan oblysy men Japonııa arasyndaǵy saýda-ekonomıkalyq, mádenı-gýmanıtarlyq yntymaqtastyqtyń perspektıvaly baǵyttaryn keńeıtý máseleleri talqylandy. Bul rette aýyl sharýashylyǵy salasyna ınvestıtsııa tartý, japondyq kásiporyndardyń qataryn arttyrý máseleleri sóz boldy.
Oblys ákimi elshi myrzaǵa Ońtústik Qazaqstan oblysynyń áleýmettik- ekonomıkalyq ahýaly men óndiristik - agrarlyq salanyń damý qarqynyn baıandap, aldaǵy ýaqytta ınnovatsııalyq tehnologııalar salasynda birlesip jumys isteýge nıetti ekenin málim etti. Osy rette ákim Shymkent qalasynan qazaq-japon ǵylymı-gýmanıtarlyq bazasyn qurýdy usyndy.
«Bizdiń oblys halqy tyǵyz ornalasqan aımaqqa jatady. Óńirdiń óndiristik-ekonomıkalyq múmkindikteri mol. Ásirese, ekonomıkanyń agrarlyq salasyna negizgi basymdyq berilgen. Aldaǵy ýaqytta Ońtústik Qazaqstan oblysy men Japonııa arasyndaǵy saýda-ekonomıkalyq, mádenı-gýmanıtarlyq yntymaqtastyq odan ári damı túsetinine senimim mol. Ol úshin bizdiń oblysymyzda sheteldik ınvestorlarǵa barlyq qolaıly jaǵdaılar qarastyrylǵan. Búginde oblysymyzda Indýstrıaldy-ınnovatsııalyq baǵdarlama aıasynda 11 ındýstrıaldyq jáne 1 arnaıy ekonomıkalyq aımaq jumys isteıdi», - dedi Janseıit Qanseıituly.
Sozaq óńirinde ýran óndiretin qazaq-japon birlesken «Appak» kásiporyny jumys isteýde. Atalǵan kompanııanyń bas ǵımaraty Shymkent qalasynda ornalasqan.
Aıta keteıik, 2017 jyly eki el arasyndaǵy ózara saýda aınalymy 1,3 mln AQSh dollaryn qurady. Qazaqstanǵa japon ınvestıtsııalarynyń birlesken túsimi sońǵy 10 jylda $6,3 mlrd-tan asqan. Qazaqstanda japon kapıtalynyń qatysýymen 70-ten astam kásiporyn bar, olar munaı men gaz, metallýrgııa, qarjy, taý-ken ónerkásibi, avtomobılderdi kóterme satý, elektr baılanys, jabdyqtardyń kóterme saýdasy, aǵash daıyndaý jáne logıstıka sııaqty salalarda jumys isteıdi.
Sonymen qatar, osy kúni Japonııanyń Qazaqstandaǵy Tótenshe jáne Ókiletti Elshisi Itıro Kavabatanyń qatysýymen Shymkent qalasyndaǵy dendrosaıabaqta aǵash otyrǵyzyldy.
