Qazaq jáne ózbek konstrýktorlary avtokran jasap shyǵardy

ASTANA. QazAqparat - QR Qorǵanys jáne aeroǵarysh ónerkásibi mınıstrligi Ózbekstanmen birlesken jobalardy iske asyrýǵa kiristi, dep xabarlaıdy QazAqparat tilshisi.

Halyqaralyq áskerı-texnıkalyq yntymaqtastyq departamentiniń dırektory Aslanbek Syrlanovtyń aıtýynsha, QR Prezıdenti Nursultan Nazarbaev Ózbekstanǵa resmı saparmen baryp kelgennen keıin ekijaqty baılanystar jandana tústi. Sol kezde áskerı-texnıkalyq yntymaqtastyq týraly úkimetaralyq kelisim de rásimdeldi.

«Sodan beri biz ózbek áriptesterimizben shamamen 15 ret kezdestik. Olarǵa Almaty, Astana men Oral qalasyndaǵy kásiporyndardy kórsettik. Budan bólek, biz áskerı-texnıkalyq yntymaqtastyq salasyndaǵy jumys tobynyń alǵashqy otyrysyn ótkizip, negizgi baǵyttardy aıqyndadyq. Olar - optıkalyq qural-jabdyqtar, áýe texnıkasyna qyzmet kórsetý, katerler jetkizý men qarý-jaraqty jańartý. Al azamattyq ónimderge keletin bolsaq, osy salada az da bolsa, naqty nátıjeler bar. Tashkent pen Kókshetaýdyń kásiporyndary 25 tonnalyq avtomobıl kranyn qurastyryp shyqty. Ony kez kelgen salada qoldanýǵa bolady. Qazir kýálik alý rásimderi júrgizilip jatyr. Aldaǵy ýaqytta ony kórshi memleketterge tasymaldaý josparlanyp otyr», - dedi A.Syrlanov Qazaqstan men Ózbekstannyń yntymaqtastyǵyna arnalǵan Halyqaralyq konferentsııada.

Aıta keteıik, Qazaqstan Ózbekstanǵa baılanys jer serigin birlesip qurastyrýdy da usyndy. Atalǵan apparat eki memleketke ǵana emes, aımaqtyń basqa da elderine qyzmet kórsete alady.

«Qazirgi kezde bizdiń ózbek áriptesterimiz sheteldiń jer serikterin qoldanyp keledi. Sondyqtan birlesip bir jer serigin qurastyrý týraly usynys jasaldy», - dep atap kórsetti A.Syrlanov.