Qazaq jambyshylary álem chempıony atandy
ASTANA. QazAqparat - 5-7 qazan kúnderi Ońtústik Koreıa Respýblıkasynyń Kańvondo provıntsııasyndaǵy Sokhcho qalasynda at ústinen sadaq atýdan Álem chempıonaty ótti, dep habarlaıdy ethnosport.kz.
23 memlekettiń alpystan astam mergenderi baq synaǵan osy Álem chempıonatynda qazaqstandyq qos surmergen Eldos Badashev pen Abzal Týlybekov komandalyq básekede bas júldeni ıelenip, Álem chempıondary atandy.
Báseke bastalardan birer kún buryn ótken semınarda bizdiń mergender Álem chempıonatyna jınalǵan sportshylar men kórermenderge «Qazaq stıli» boıynsha jamby atýdyń ádis-tásilderin túsindirip, arnaıy alańda at ústinen atyp ta kórsetken. Sóıtip, «Qazaq stıli» boıynsha birneshe memleket mergenderi qatysqan jarys uıymdastyrylǵan. Jamby atýdyń básekesine qatty qyzyqqan Ońtústik Koreıa Respýblıkasyndaǵy Dúnıejúzilik at ústinen sadaq atý federatsııasynyń prezıdenti Kım ıÝng Sýp myrza semınar ústinde «Qazaq stılin» kelesi jylǵy Álem chempıonatyna qosýǵa ýáde berip, QR Ulttyq at sporty qaýymdastyǵyna arnaıy sertıfıkat joldaǵan.
Álem chempıonatynda bizdiń mergender jartylaı fınalda mońǵolııalyqtardan, aqtyq básekede ońtústik koreıalyqtardan basym túsip, Álem chempıonatynyń altyn medalin oljalady. Osy jarys ústinde Abzal Týlybekov eń kishkentaı nysana atýdan (15h15 sm) rekordtyq kórsetkishke qol jetkizgen. Buǵan deıin mundaı usaq nysanaǵa Abzal sııaqty qatarynan tórt jebesin qatarynan qadaǵan mergen bolmapty.
Eske salyp ótsek, Eldos Badashev pen Abzal Týlybekov buǵan deıin at ústinen sadaq atýdan Túrkııa, Vengrııa, Iordanııada ótken dúnıejúzilik jarystarǵa qatysqan tájirıbeli sportshylar. QR chempıonatynyń jeńimpazy, Astanada eki jyl qatarynan uıymdastyrylǵan «Altyn jebe» halyqaralyq týrnıriniń júldegerleri.
Álem chempıony atanǵan mergenderdi saltanatty qarsy alý rásimi Almaty áýejaıynda ótedi. Jeńimpaz mergender Eldos Badashev pen Abzal Týlybekov 9 qazan kúni saǵat 22-de Almaty áýejaıyna ushyp keledi.
