Qazaq veterınarııa ınstıtýtynyń jer ýchaskesi óz menshiginde qalady

ASTANA. KAZINFORM — Qazaq veterınarııa ǵylymı-zertteý ınstıtýtynyń Almaty ákimdigi almaq bolǵan jer ýchaskesi ózinde qalatyn boldy. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan. 

— Qazirgi ýaqytta Almaty qalasynyń ákimdigi Raıymbek dańǵylyn jańǵyrtý jobasynyń ózgerýine baılanysty buǵan deıin «Qazaq veterınarııa ǵylymı-zertteý ınstıtýtynyń» alyp qoıý josparlanǵan jer ýchaskesin (aýdany 0,0188 gektar) buzylatyn aýmaqtan shyǵarý týraly sheshim qabyldady. Ákimdiktiń tıisti qaýlysy kelisý satysynda tur, — dedi Oljas Bektenov.

Úkimet basshysynyń málimetinshe, 2025 jyly Bas prokýratýra atalǵan ınstıtýttyń jer ýchaskelerin ıelikten shyǵarý jáne jekeshelendirý faktileri boıynsha tekserý júrgizgen.

— Nátıjesinde ákimdiktiń jerdi, onyń ishinde turǵyn úı qurylysyna alyp qoıý faktileri rastalǵan joq. Munyń ústine Qazaq veterınarııa ǵylymı-zertteý ınstıtýtynyń bastapqyda 40 gektar aýmaǵy bolǵanyn rastaıtyn muraǵat materıaldary tabylmady. Sonymen qatar ózge jer ýchaskelerin (7,01 gektar) berý barysynda zańdylyqtyń buzylýy anyqtalǵan joq. Muraǵat materıaldaryn izdeý jalǵasyp jatyr, — dedi Premer-mınıstr.

Buǵan deıin «Veterınarııa» mamandyǵyndaǵy stýdentterdiń stıpendııasy ósýi múmkin ekenin jazǵan edik.