Qazaq veterınarııa ınstıtýty QazBioPharm quramynan shyǵaryla ma

ASTANA. KAZINFORM – Premer-mınıstr Oljas Bektenov Senat depýtattarynyń Qazaq veterınarııa ǵylymı-zertteý ınstıtýtyn «QazBioPharm» ulttyq holdıngi quramynan shyǵarý usynysyna jaýap berdi.

Úkimet basshysynyń atap ótýinshe, QazVǴZI sanıtarııalyq-epıdemıologııalyq jáne veterınarlyq-sanıtarııalyq saladaǵy biryńǵaı memlekettik saıasatty júzege asyrý jáne mindetterdi keshendi sheshý úshin atalǵan holdıngtiń quramyna yqpaldastyrǵan. Sonymen qatar bul shara ınstıtýttyń ǵylymı nátıjelerin kommertsııalandyrýǵa jáne ekonomıkalyq turaqtylyǵyn arttyrýǵa baǵyttalǵan.

- Yqpaldastyrý nátıjesinde Táýelsiz memleketter dostastyǵy elderine ǵylymı ázirlemelerdi kommertsııalandyrý jáne ónim eksportynyń aıtarlyqtaı artqany baıqalady. QazVǴZI-di holdıng quramynan shyǵarý ǵylymı aktıvterdiń tıimdi shoǵyrlanýyna teris yqpal etip, «ǵylym – ázirleme – óndiris - engizý» tizbegin buzýy jáne bıologııalyq qaýipsizdik salasyndaǵy vedomstvoaralyq úılestirý sapasyn tómendetýi múmkin. Onyń ınstıtýtsıonaldy tıesiligi máselesin vedomstvolyq ne bolmasa múlikti qaıta bólý retinde emes, ulttyq bıologııalyq jáne epızootıkalyq qaýipsizdikti qamtamasyz etý ustanymynda ǵana qarastyrǵan jón. Osyǵan oraı, QazVǴZI-di holdıng quramynan shyǵarý belgilengen problemalardy sheshýge qyzmet ete almaıdy jáne bıologııalyq qaýipsizdikti basqarýdyń fragmentatsııalyq júıesine táýekel týdyrady, - dedi Oljas Bektenov.

Buǵan deıin Qazaq veterınarııa ǵylymı-zertteý ınstıtýtynyń Almaty ákimdigi almaq bolǵan jer ýchaskesi ózinde qalatynyn jazǵan edik.