Qazaq ulttyq ýnıversıtetiniń 80 jyldyǵy - búkil qazaq halqynyń toıy - Ábilfaıyz Ydyrysov
ALMATY. QaAqparat - Qazaq ulttyq ýnıversıtetiniń 80 jyldyǵy - búkil qazaq halqynyń toıy. Bul týraly búgin ál-Farabı atyndaǵy Qazaq ulttyq ýnıversıtetinde ótken «Qarııalar - altyn qazyna» atty saltanatty jıynda tarıh ǵylymdarynyń doktory, professor Ábilfaıyz Ydyrysov málim etti.
Onyń aıtýynsha, qazaq biliminiń qara shańyraǵy atanǵan Qazaq ulttyq ýnıversıtetiniń 80 jyldyǵy tek ýnıversıtet ujymy men stýdentteriniń ǵana emes, búkil qazaq halqynyń toıy.
«Bul ýnıversıtetten kimder shyqpady. Bul ýnıversıtette kimder istemedi. Munda kemeńger jazýshy Muhtar Áýezov, kórnekti tarıhshy Bekmahanov sekildi uly tulǵalar jumys istedi. 80 jyldyń ishinde ýnıversıtette 12 adam rektor bolypty. Bul árkimniń mańdaıyna bite bermeıtin baq. Men solardyń 10-yn tikeleı bilemin. Bireýin jáı ǵana bilsem, endi bireýin aǵa retinde bilemin. Qalǵandaryn zamandas retinde bilemin. Al ýnıversıtettiń mereıtoıymen barsha jurtshylyqty shyn júrekten quttyqtaımyn» - dedi óz sózinde osy qara shańyraqta 60 jyl ustazdyq etken tarıh ǵylymdarynyń doktory, professor, Qazaqstannyń eńbek sińirgen mádenıet qaıratkeri Ábilfaıyz Ydyrysov.
Al osy ýnıversıtette sonaý 1955 jyldan kúni búginge deıin belsene qyzmet atqaryp kele jatqan maıtalman ustaz, zań ǵylymdarynyń doktory, professor, elimizdiń talaı iri-iri zań jobalaryn jasaýǵa belsene atsalysqan, búginde 84 jasqa aıaq basqan zańger ǵalym Sultan Sartaev ta óz qýanyshyn jasyrmady:
«80 jyldyń ishinde bul qasıetti qara shańyraq elimizge qajetti san myńdaǵan mamandardy tárbıelep shyǵardy. Óıtkeni bizdiń basty maqsatymyz, Qazaqstanǵa qajetti kadrlardy daıarlaý boldy. Qazir Qazaqstannyń qaı buryshyna barsańyz da bizdiń ýnıversıtetti bitirgen azamattardyń jumys istep júrgenin kóresiz. Sony kórgende qýanamyz. Olar da qýanady: «O, bul kisiler bizdiń oqytýshylarymyz bolǵan», - desip jatady. Men búgin men solardy da osy ýnıversıtettiń 80 jyldyǵymen quttyqtaımyn», - dedi óz sózinde Sultan Sartaev.
Esterińizge sala keteıik, búgin ál-Farabı atyndaǵy QazUÝ-dyń 80 jyldyq mereıtoıyna arnalǵan onkúndik aıasynda osy qara shańyraqtyń ardagerlerine qurmet kórseteýge arnalǵan saltanatty jıyn ótti. Jıyn barysynda ýnıversıtettiń 80 jyldyq mereıtoıy qarsańynda jetken tabystary týraly arnaıy fılm kórsetildi. Sonymen qatar, jıyn sońynda ardagerler «ál-Farabı atyndaǵy QazUÝ-dyń 80 jyldyq» mereıtoılyq medalimen marapattaldy. Odan basqa, qadirli ustazdar ýnıversıtettegi jańa ınfraqurylymdyq nysandarmen, atap aıtqanda stýdentterge qyzmet kórsetýdiń jańa úlgisi bolyp tabylatyn «Keremet» jastar resýrstyq ortalyǵynyń jumysymen jáne «ál-Farabı» murajaıymen tanysty.
