Qazaq Ulttyq Óner ýnıversıteti shyǵarmashylyq qatynastaryn keńeıtýde
ASTANA. QazAqparat - Qazaq ulttyq óner ýnıversıtetiniń rektory Aıman Musaqojaevanyń basqarýymen QazUÓÝ ókilderiniń Amerıka Qurama Shtattaryna jumys sapary barysynda Gollıvýdtegi Mýzykalyq ınstıtýtpen (Musicians Institute, MI) jáne Los-Andjelestegi New York Film Akademııasymen ózara yntymaqtastyq týraly memorandýmdarǵa qol qoıyldy, dep habarlaıdy QR Mádenıet jáne sport mınıstrliginiń baspasóz qyzmeti.
Qol qoıý barysynda taraptar mádenıet, ǵylym jáne bilim salasyndaǵy ózara seriktestik týraly kelisimge keldi. Sonymen qatar, oqytýdyń jańa tásilderin izdeý jáne damytý, aqparattandyrý salasynda jańa jetistiktermen almasý, ónerdegi jańa ádis-tásilderdi qoldaný máseleleri boıynsha kelisimge qol jetkizdi.
AQSh-tyń eki jetekshi bilim berý mekemeleri ártúrli pánder boıynsha daıarlaý men taǵylymdamadan ótkizý úshin stýdenttermen, magıstranttarmen jáne doktoranttarmen almasýdy qoldaıtyny kelisimniń asa mańyzdy bóligi boldy. Eń bastysy, bul Qazaqstannyń jas jáne talantty stýdentteri úshin álemdik mýzykalyq jáne kıno salasyndaǵy jetekshi jobalardy júzege asyrýdyń biregeı múmkindigi.
Qos tarap kezdesý barysynda birlesken jobalarǵa qatysty kóptegen máselelerdi, atap aıtqanda akademııalyq utqyrlyq boıynsha stýdenttermen almasý men kontsertterdi birlesip uıymdastyrý múmkinshilikterin talqylady.
AQSh boıynsha sapary sońynda, QazUÓÝ rektory Aıman Musaqojaeva ıArmýk Ýnıversıtetiniń prezıdenti Refat A.Alfaouri myrzamen kezdesti. Bul júzdesýdiń nátıjesinde Irbıd qalasyndaǵy (Iordán Hashımı́t Koroldigi) ıArmýk Ýnıversıteti men QazUÓÝ arasyndaǵy yntymaqtastyq týraly memorandýmǵa da qol qoıyldy.
Memorandým aıasynda taraptar ártúrli pánder boıynsha taǵylymdamadan ótý úshin stýdentter, magıstranttar men doktoranttarmen almasýdaǵy tájirıbesin damytýdy, ǵylym, mádenıet jáne bilim berý salasyndaǵy eki jaqty yntymaqtastyq múmkindikterin qarastyrdy.
